Այն, ինչ հիմա տեղի է ունենում բողոքի ցույցերի ժամանակ, հասարակության փորձն է իշխանություններին իրենց քաղաքական ու տնտեսական բողոքը հայտնել։ Այս մասին NEWS.am-ի թղթակցի հետ զրույցում հայտարարեց Կովկասի ինստիտուտի փոխտնօրեն Սերգեյ Մինասյանը։
Քաղաքագետի խոսքով՝ իր գոյությունը գրեթե դադարեցրել է «Բարգավաճ Հայաստան» կուսակցությունը, եւ Հայաստանում չի մնացել քաղաքական եւ սոցիալ-տնտեսական դժգոհության կարգավորման որեւէ մեխանիզմ։ «Այսպիսով հասկանալի է, որ նման իրադարձություններ պիտի տեղի ունենան։ Իշխանությունները, որոնք քայլում էին իրենց համար առավել հեշտ ճանապարհով, կարելի է ասել պատին դեմ առան։ Հիմա այնպիսի իրավիճակ է, որ իշխանությունները չգիտեն ում հետ խոսեն եւ պայմանավորվեն։ Դա խնդիր է նաեւ ցուցարարների համար, քանի որ ինչ-որ պահի ին-որ մեկի նյարդերը կարող են տեղի տալ։ Մենք տեսել ենք, թե ինչպես է դա երկուստեք տեղի ունենում»,-ասել է քաղաքագետը։
Հարցին, թե ինչպես նա կբնութագրի հավաքվածներին, Մինասյանը պատասխանեց, որ մարդիկ փոխվում են։ «Մինչ այս այստեղ ոսկե երիտասարդություն էր, հիմա ավելի շատ սոցիալապես ցածր խավի մարդիկ են հավաքվել, եւ պայքարը կքաղաքականացվի արդեն ավելի կոնկրետ աշխարհաքաղաքական ձեւակերպումներով»,-ասաց Մինասյանը։