Բելառուսը պատրաստ է հարթակ տրամադրել՝ Եվրամիության եւ Եվրասիական տնտեսական միության միջեւ ապագայում ընդհանուր տնտեսական տարածք ստեղծելու հարցերը քննարկելու համար: Այս մասին երկուշաբթի հայտարարել է Բելառուսի ԱԳ նախարար Վլադիմիր Մակեյը:
«Վստահ եմ հարեւանների, մասնավորապես՝ Ռուսաստանի հետ Եվրամիության կողմից երկխոսության եւ փոխգործակցության հաստատման անհրաժեշտության հարցում, «Արեւելյան գործընկերության» հիմնարար նպատակներին՝ խաղաղության, կայունության եւ տարածաշրջանում անվտանգության հաստատման հասնելու համար»,- մամուլի ասուլիսի ժամանակ հայտարարել է Մակեյը:
Ըստ ՌԻԱ Նովոստիի, նախարարն ընդգծել է, որ դա նաեւ հնարավորություն կընձեռի խուսափել Եվրոպայում նոր բաժանարար գծերի առաջացման հեռանկարից:
ԵՄ «Արեւելյան գործընկերության» ծրագիրը նախատեսում է Ադրբեջանի, Հայաստանի, Բելառուսի, Վրաստանի, Մոլդովայի եւ Ուկրաինայի հետ քաղաքական ասոցացում եւ տնտեսական ինտեգրում: Վերջին երեք երկրներն անցյալ տարի ստորագրեցին Եվրամիության հետ Ասոցացման մասին համաձայնագիրը:
