ՀԷՑ-ի չարաշահումները պետք է բացահայտել ոչ թե աուդիտ անցկացնելով, այլ համապատասխան քննչական եւ օպերատիվ-հետախուզական գործողություններ իրականացնելով: Այս մասին այսօր՝ հունիսի 29-ին, Ազատության հրապարակում NEWS.am-ի հետ զրույցում ասաց իրավաբան Նիկոլայ Բաղդասարյանը:
«ՀԷՑ-ում ատկատ է եղել, բայց դրա բացահայտումը շատ բարդ գործընթաց է, պետք է պրոֆեսիոնալ քննիչներ լինեն, որպեսզի կարողանան այդ հանցագործությունը բացահայտել»,-ասաց փաստաբանը ՝ ավելացնելով, որ չարաշասհումները բացահայտելու դեպքում պետք է պատասխանտվության ենթարկվեն եւ «ատկատ տվողը» եւ «ատկատ ստացողը»:
Նիկոլայ Բաղդաասսարյանը նշեց, որ էլեկտրաէներգիայի թանկացման վերաբերյալ պետք է քրեական գործ հարուցվեր եւ կասեցվեր սակագնի բարձրացման վարչարարությունը, նախքան գործով բավարար ապացույցներ հայտնաբերելը:
Փաստաբանը նաեւ ոչ իրավաչափ գնահատեց հունիսի 23-ի առավոտյան ոստիկանների գործողությունները Բաղրամյան պողոտայում, բայց վստահ է, որ դրա վերաբերյալ երբեք քրական գործ չի հարուցվի:
Հունիսի 22-ի երեկոյան ժամը 19:00-ից քաղաքացիները հավաքվել են Բաղրամյան պողոտայում, փակել այն եւ պահանջում են կասեցնել հունիսի 17-ին կայացրած որոշումը: Հունիսի 28-ին ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: