Ոստիկանությունը Բաղրամյան պողոտայում ընդդեմ էլեկտրաէներգիայի թանկացման ցույցի մասնակիցներին կոչ է արել չաղմկել։ Երեւանի ոստիկանապետ Վալերի Օսիպյանը մի խումբ ոստիկանների ուղեկցությամբ մոտեցել է ամբիոնի մոտ կանգնածներին, կոչ արել պահպանել համակեցության կանոնները եւ չաղմկել։
Ինչպես հայտնում է NEWS.am-ի թղթակիցը, Օսիպյանը բավական զայրացած է եղել, սպառնացել, որ եթե աղմուկը չդադարեցվի, ինքը ստիպված կլինի կարգի հրավիրել ցուցարարներին։ «Մենք ցանկություն չունենք որեւէ խնդիր ունենալ ձեզ հետ։ Մենք ձեզանից մեկն ենք։ Ուղղակի գտնվում ենք բազմաբնակարան շենքերի տարածքում, իրավունք չունենք խանգարել»,- ասել է նա։
Նշենք, որ հունիսի 29-ին Օսիպյանը արգելել էր բարձրախոսներ ետղադրել Բաղրամյան պողոտայում, եւ ցուցարարները ստիպված են ձեռքի փոքր բարձրախոսներով հայտարարությունները տարածել։
Այսօր չափազանց նոսրացել է քաղաքական գործիչներից եւ հայտնիներից բաղկացած կենդանի պատը, միայն հատուկենտ անձինք են պատ կազմել ոստիկանների եւ ցուցարարների միջեւ։
Իրավիճակը հանդարտ է նաեւ Ազատության հրապարակում, որտեղ գտնվում են «Ոչ թալանին» նախաձեռնության անդամների հետ երեկվանից Բաղրամյանից տեղափոխվածները։ Նրանց են միացել շոուբիզնեսի դեմքեր, անգամ երգիչ Արսեն Գրիգորյանն է երգել։
Հունիսի 22-ի երեկոյան ժամը 19:00-ից քաղաքացիները հավաքվել են Բաղրամյան պողոտայում, փակել այն եւ պահանջում են կասեցնել հունիսի 17-ին կայացրած որոշումը: Հունիսի 28-ին ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: