Ազատության հրապարակում դադարեցված նստացույցի մասնակիցները քիչ առաջ միացան Բաղրամյան պողոտայի ցուցարարներին։
Նրանք՝ «Ոչ թալանին» նախաձեռնության անդամներ Վաղինակ Շուշանյանի եւ Մաքսիմ Սարգսյանի գլխավորությամբ, միացել են Բաղրամյան պողոտային։
Ինչպես հայտնում է NEWS.am-ի թղթակիցը, ակտիվիստների միջեւ, սակայն, ակնհայտ երեւում են տարաձայնությունները։ Մաքսիմ Սարգսյանն ու Վաղինակ Շուշանյանը եկել էին ոստիկանների եւ ցուցարարների միջեւ գտնվող բուֆերային գոտի, իսկ «Ազատ դեմոկրատներ» կուսակցության երիտթեւի ղեկավար, նախաձեռնության անդամ Նարեկ Այվազյանը նրանց հրավիրեց ժողովրդի մեջ՝ միանալու քննարկմանը։
Նշենք, որ Վաղինակ Շուշանյանն էլ նշել է, թե իր ընկերները մնալու են Բաղրամյան պողոտայում գիշերը, բայց իր առողջական վիճակը չի ներում, եւ տուն է գնալու։
Նարեկ Այվազյանը հայտարարեց, թե հիմա քննարկումներ են գնում նոր նախաձեռնող խումբ ստեղծելու ուղղությամբ։ Ստեղծվելու են նաեւ 10-հոգանոց խմբեր՝ իրավիճակը վերահսկելու եւ նստացույցի կազմակերպչական հարցերի համար։
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
