Բա ուր է մեր կենդանի «շիտը», չեն վախենո՞ւմ ոստիկաններից, որ հեսա կկոտորեն: Այս մասին այսօր՝ հունիսի 30-ին, Բաղրամյան պողոտայում դիմելով սակավաթիվ ակտիվիստներից հայտարարեց ՀՀ ոստիկանապետ Վլադիմիր Գասպարյանը:

«Բացե՞մ, թե էլի սպասեմ, ձեզ հոգնացնեմ: Էսքանդ եք մնացե՞լ, որ դիմադրողականություն ունեք, մնացածը բոլորը հիասթափվել են այս ամեն ինչից: Մեկ ասում են ամոթ է, մեկ էլ ասում են՝ թող մեր հասարակությունը սովորի հանդուրժողականություն: Ինչքան մարդ կլինեն՝ մի 70-60:

Էն մեր սերնդի ծերուկ ավազակներն այստեղ չեն, նրանք գալիս խառնում, թողնում գնում են, կամ կռված տղերքը: Կռված տղերքը կռվարարություն չեն սիրում: Կռիվ տեսած տղերքը խաղաղություն են սովորեցնում, այլ ոչ թե գալիս են «մուտիլովկեքով» են զբաղվում: Թող Աստված մեր արդարությամբ մեզ դատի, իսկ իրենց արդարությամբ գթա ու ների, քանզի մոլորյալ են ու չգիտեն, թե ինչ են անում»,- հայտարարեց Վլադիմիր Գասպարյանն ու հեռացավ ոստիկանների խմբի հետ:

Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։

Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: