Ամերիկյան Լոս Անջելես քաղաքի շրջանում երկրակեղեւի պատռվածքն ավելի խորն է, քան նախկինում էր համարվում, ինչը կարող է հզոր երկրաշարժի պատճառ դառնալ: KPCC ռադիոկայանի փոխանցմամբ, այսպիսի եզրահանգման է եկել Սանտա Բարբարայի Կալիֆորնիական համալսարանի երկրաբան Ջիմ Բոուլզը:
Հետազոտության ընթացքում գիտնականը պարզել է, որ մեծ Լոս Անջելեսի տարածքում երկրակեղեւի պատռվածքի պատճառով հելիում գազի զգալի արտահոսք է տեղի ունենում:
Ըստ ՏԱՍՍ գործակալության, գիտնականին հաջողվել է հավաքել եւ քիմիական անալիզի ենթարկել պատռվածքից դուրս հոսող հելիումը, ինչի արդյունքում նա կանխատեսում է, որ առաջիկա 30 տարիների ընթացքում Լոս Անջելեսում 7 մագնիտուդով երկրաշարժ տեղի կունենա: Մինչ այս, մասնագետներն ավելի պակաս աղետալի՝ 4.7 մագնիտուդով երկրաշարժի մասին էին հայտնում: