Քուվեյթի էմիր շեյխ Սաբահ ալ Ահմեդ ալ Ջաբարը հրամայել է կարճ ժամկետներում վերականգնել շիական մզկիթը, որտեղ անցյալ ուրբաթ ահաբեկչություն էր տեղի ունեցել։ Այս մասին հայտնում է «Ալ Կաբասը»։
«Նորին գերազանցություն էմիրը պնդում է, որպեսզի իմամ Աս Սադիկի մզկիթը արագ վերականգնվի»,- մեջբերում է պարբերականը շեյխի աշխատակազմի ղեկավար Մուհամմեդ Աբդուլլահ Ալ Մուբարաք Աս Սաբահի խոսքը, գրում է ՏԱՍՍ-ը։
Հիշեցնենք, որ մահապարտն իր մարմնին ամրացված ռումբը Էլ-Քուվեյթի կենտրոնում գտնվող շիաների մզկիթում գործի էր դրել հունիսի 26-ին՝ ուրբաթօրյա աղոթքի ժամանակ: Ահաբեկչությունից զոհվել էր 27 մարդ, եւս 227 հոգի վիրավորվել է: Ահաբեկչության պատասխանատվությունը ստանձնել է «Իսլամական պետություն» ահաբեկչական խմբավորումը: