Բրյուսելում հունիսի 27-ի գիշերը սպանված հայ երիտասարդը ոչ թե 25, այլ 28-ամյա Գրիգոր Հովհաննիսյանն է: Այս մասին NEWS.am-ի թղթակցին հայտնեցին նրա հարազատները:
Գրիգոր Հովհաննիսյանը 3 տարի է՝ բնակվում եւ սովորում էր Բրյուսելում: Հայաստանում նա ավարտել է Կոնսերվատորիան, դասական երգիչ է, անգամ տեսահոլովակ ունի, նույն մասնագիտությամբ էլ շարունակում էր ուսումը արտերկրում, նպատակ ուներ ավարտել նաեւ ասպիրանտուրան:
Հարազատներից տեղեկացանք նաեւ, որ ուսմանը զուգահեռ երիտասարդը նաեւ տարբեր համերգների, միջոցառումների էր մասնակցում: Նրա հայրը, մայրը գտնվում էին Երեւանում, Բրյուսելում ուներ հարազատներ, քույրը,եղբայրը եւս ամուսնացել են արտերկրում: Գրիգորը սիրելի ուներ, Հոլանդիայում ապրող հայ աղջիկ է, ում հետ պետք է առաջիկայում նշանադրվեր:
Ինչ վերաբերում է միջադեպին, հարազատները նշեցին, որ դեպքը եղել է Գրիգորի բնակությունից 30մետր հեռավորությամբ գտնվող սրճարանում, երիտասարդը հաճախակի էր լինում այդ սրճարանում, աշխատողները հայեր էին: «Մի քանի հոգի եղել են ոգելից խմիչքի, թմրանյութի ազդեցությամբ եւ անկանոն կրակ են բացել, կրակոցներից մեկն էլ դիպել է իրեն, ինքը կոնֆլիկտը շրջանցող անձնավորություն է եւ կապ չունի ոչ մի միջադեպի հետ»,-հայտնեց նրա բարեկամը՝ հավելելով, որ կրակոցներ արձակողը հայ համայնքում ոչ բարի համբավ ունեցող եղբայրներ են, նրանցից մեկին ձերբակալել են:
Գրիգոր Հովհաննիսյանին չեն տեղափոխի Հայաստան, ծնողները գնացել են Բրյուսելում նրա հուղարկավորությանը մասնակցելու համար:
Ավելի վաղ հայտնել էինք, որ Բրյուսելում հունիսի 27-ի գիշերը սպանվել է 25-ամյա ուսանող՝ Գրիգոր անունով (ազգանունը նշված չէ)։ Այս մասին տեղեկացնում է lacapitale.be-ն։ Համաձայն մամուլում շրջանառվող վարկածի՝ երիտասարդը հաշվեհարդարի զոհ է դարձել, թեպետ նրա հարազատները պնդում են, որ նա ուղղակի անհարմար պահի հայտնվել է անհարմար վայրում։ Ֆերդինանդ Լենուար փողոցի բնակիչները ոստիկանություն էին զանգել այն բանից հետո, երբ շարունակվող կրակոցներ էին լսել։ Դեպքի վայր ժամանած ոստիկանները հայտնաբերել էին երիտասարդի դին։ Ականատեսների վկայությամբ՝ փողոցում ծեծկռտուք էր տեղի ունեցել, որին երիտասարդը չէր մասնակցել։