Էլեկտրաէներգիայի թանկացման հետ կապված անապահով ընտանիքներին փոխհատուցում տալու մասին որոշումը կախված է թանկացման որոշումից: Այս մասին NEWS.am-ի թղթակցի հետ զրույցում նշել է Աշխատանքի եւ սոցիալական հարցերի նախարար Արտեմ Ասատրյանը:
Նրա խոսքով, փոխհատուցման որոշումը դեռ չի ստորագրվել, որի ուժի մեջ մտնելը կախված է սակագնի վերաբերյալ վերջնական որոշումից:
Դիտարկմանը, թե եթե չլինի թանկացում չի լինի նաեւ փոխհատուցո՞ւմ, նախարարն արձագանքել է. «Երկրորդը կախված է առաջինից, հետեւաբար երկրորդ որոշումը դեռ չի ստորագրվել»:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: