Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով նախաքննությունը դեռ շարունակվում է: Գործով մեղադրյալ Վաչե Սահակյանի փաստաբան Արմեն Նադիրյանը NEWS.am-ի թղթակցի հետ զրուկցում ասաց, որ իրենց կողմից ներկայացված բոլոր հիմնավոր միջնորդությունները անհիմն մերժվում են, առերեսումները՝ հետաձգվում:
Նա շեշտեց, որ մինչեւ այժմ քննությամբ որեւէ ապացույց ձեռք չի բերվել, որը կապացուցեր իր պաշտպանյալի մեղավորությունը սպանության մեջ:
«Մի քանի կցկտուր, հակասական ցուցմունքներ, են, մեղադրանքը հիմնված է դրա վրա: Թեեւ ապացուցելու բեռը դրված է նախաքննական մարմնի վրա, բայց մենք միջնորդել ենք պոլիգրաֆոֆ հետազոտություն անեն ներքին համոզմունք ձեւավորելու համար: Իմ պաշտպանյալը հայտարարել է, որ պատրաստ է ստի դետեկտոր անցնելուն, իսկ արդյունքում ձեռք բերված նյութերը թող տան հոգեբան-փորձագետներին, սակայն տարօրինակ կերպով մեր միջնորդությունները մերժում են: Մենք պատրաստ ենք բացարկ հայտնել քննչական մարմիններին եւ դատախազությանը, քանի որ անհասկանալի է՝ ինչն է խանգարում նրանց բավարարել մեր միջնորդությունը: Նրանք ամեն կերպ փորձում են մեղադրանքը բարդել այդ չորսի վրա, քանի որ ի սկզբանե բարձրաստիճան պաշտոնյանների կողմից հայտարարվեց, թե նրանք են արել սպանությունը»,-ասաց փաստաբանը:
Նա նշեց, որ քննությամբ առայժմ պարզ է, որ կուրսանտին սպանել են, հետո կախել, բայց կոնկրետ իր պաշտպանյալի մասով փորձաքննությամբ որեւէ առնչություն չի ստացվել, որեւէ մանրաթել, արյան հետք չկա:
Հիշեցնենք, որ հունվարի 29-ին՝ ժամը 06:35-ի սահմանում Երեւանում տեղակայված ուսումնական զորամասերից մեկի մարզահրապարակում հայտնաբերվել էր նույն զորամասի 1-ին կուրսի ուսանող Հայկազ Արկադիի Բարսեղյանի դին՝ պտտաձողի վրա պարանով կախված վիճակում:
Դեպքի առթիվ ՀՀ քննչական կոմիտեի զինվորական քննչական գլխավոր վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 7-րդ կետով: Մեղադրանք է առաջադրվել Հայկազ Բարսեղյանի համածառայակիցներ Վաչե Սահակյանին, Մովսես Ազարյանին, Գնել Թեւոսյանին եւ Նորիկ Սահակյանին, նրանք կալանավորված են: