Անցյալ հանգստյան օրերին տասը հազար ցուցարարներ դուրս եկան Հայաստանի մայրաքաղաք Երեւանի փողոցներ՝ չնայած կառավարության կողմից ձեռնարկված կոշտ միջոցառումներին: Ռուսական լրատվամիջոցների արձագանքը ցույց է տալիս, որ Կրեմլը նյարդայնանում է, քանի որ Հայաստանի նախագահ Սերժ Սարգսյանը Մոսկվայի մերձավոր դաշնակիցն է: Այս մասին գրում է ամերիկյան «The Wall Street Journal»-ը:
«Հայկական առաջնորդն ու նրա ռուսաստանցի հովանավորները, թվում է, գիտակցեցին ազգային զգացմունքների խորությունը: Անցյալ հանգստյան օրերին Կրեմլը 200 մլն դոլար տրամադրեց՝ Հայաստանին ռազմական օգնության տեսքով: Մոսկվան նաեւ համաձայնեց հայկական դատարանին հանձնել ռուսական զինծառայողի գործը, որին կասկածում են հունվարին հայ ընտանիքի սպանությունն իրականացնելու մեջ»,- նշում է պարբերականը:
Հոդվածի հեղինակը կարծիք է հայտնել, որ Պուտինի համար խաղաքարտի վրա Հայաստանում իր ռազմական ներդրումներն են: «Գյումրիի 102-րդ ռազմաբազան, որտեղ շուրջ 3 հազար զինծառայող կա, չափազանց կարեւոր ռուսական հենակետ է հարավկովկասյան միջանցքում, առանց որի Մոսկվան չի կարող վերահսկել Կասպից ծովն ու Կենտրոնական Ասիան»,- կարծում է նա:
Հեղինակն ընդգծում է նաեւ, որ Պուտինը նաեւ կայունություն է ցանկանում Եվրասիական տնտեսական միությունում, որին Հայաստանը միացավ այս տարի: Պարբերականի փոխանցմամբ, միաժամանակ, ԱՄՆ-ի եւ Եվրոպայի կողմից վճռական գործողություններ չեն նկատվում՝ դեպի Արեւմուտք ուղղված քայլերը խրախուսելու համար:
