Ռուսաստանի եւ Հայաստանի նախագահներ Վլադիմիր Պուտինն ու Սերժ Սարգսյանը Հայաստանում էլեկտրաէներգիայի սակագնի հարց չեն քննարկել, քանի որ դա ներհայաստանյան խնդիր է, իսկ քննարկումը ծավալվել է երկկողմ հարաբերությունների շուրջ: Այս մասին տեղեկացրել է ՌԴ նախագահի մամուլի խոսնակ Դմիտրի Պեսկովը:
«Ո՛չ: Էլեկտրաէներգիայի գնի հարցը, այսպես ասենք, ներհայաստանյան հարց է, որը, անկասկած, չի կարող քննարկվել Ռուսաստանի Դաշնությունում»,- լրագրողներին ասել է Պեսկովը:
ՌԻԱ Նովոստիի փոխանցմամբ, երեքշաբթի Պուտինը հեռախոսազրույց է ունեցել հայ գործընկերոջ հետ՝ նրան շնորհավորելով ծննդյան տարեդարձի առիթով: Կրեմլի մամուլի ծառայության փոխանցմամբ, զրուցակիցները կարծիքներ են փոխանակել նաեւ ԵՏՄ շրջանակում ինտեգրման գործընթացների զարգացման մասին:
