Քիչ առաջ Բաղրամյան պողոտայում նստացույցի մասնակիցները ոստիկաններին հայտնեցին, որ ալկոհոլ օգտագործած երկու անձ կա պողոտայում եւ հավանաբար նրանք այդ նպատակով են գալիս:
Ոստիկանությունը ալկոհոլ օգտագործած երեք անձի բերման ենթարկեց: Ոստիկանական մեքենայով գնացին նաեւ այն երկու աղջիկները, որոնք ոստիկանությանը հայտնել էին նրանց ոչ սթափ լինելու մասին:
Ակտիվիստների խոսքով, իրենք դեռ վաղ առավոտյան տեսել են, որ նրանք գարեջուր են խմում եւ խնդրել են լքել հարթակը, հավաքին խանգարում է, նաեւ օրենքի խախտում է:
«Մոտ երկու ժամ չկարողացանք համոզել այդ երիտասարդներին, անընդհատ փորձում էին կռիվ հրահրել: Դա նրանց չհաջողվեց, քանի որ չենք տրվում սադրանքներին: Ստիպված էինք դիմել ոստիկանությանը, եւ ոստիկանությունն արագ արձագանքեց»,-ասաց ակտիվիստներից Վահագն Մինասյանը՝ հավելելով, որ նրանց նախկինում չի նկատել:
Նշենք, որ հունիսի 30-ին ժամը 18-ից երկու ակտիվիստներ հացադուլ են հայտարարելով՝ պահանջելով չեղարկել էլեկտրաէներգիայի թանկացման որոշումը:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: