Լյուքսեմբուրգը 6 ամիս կղեկավարի Եվրամիության խորհուրդը, որն իր նիստերը գումարում է անդամ երկրների նախարարների մակարդակով եւ մասնավորապես զբաղվում է միգրացիոն քաղաքականության, ԵՄ ընդլայնման եւ հարկերից խուսափելու դեմ պայքարի հարցերում դիրքորոշումների հստակեցմամբ։
Լյուքսեմբուրգը, որը նախագահությունը ստացել է Լատվիայից, կնախագահի ԵՄ խորհրդում արդեն 12-րդ անգամ։ ԵՄ Խորհրդի նախագահի լիազորությունների մեջ է մտնում օրինաստեղծ ընթացակարգերի մշակումը, ԵՄ օրակարգի ապահովումը, անդամ երկրների միջեւ փոխզիջումներ գտնելը ու վիճելի հարցերում չեզոք դիրքորոշում բռնելը, փոխանցում է «ՌԻԱ Նովոստի»-ն։
Նշենք, որ արդեն հունիսին Լյուքսեմբուրգը պետք է կարողանա փոխզիջումային տարբերակ մշակել միգրացիոն քաղաքականության հարցում։ Հունիսի 25-ի ԵՄ գագաթնաժողովում առաջնորդները պայմանավորվել են ընդունել Հունաստան եւ Իտալիա ժամանած 40 հազար, ինչպես նաեւ 3-րդ երկրներից ժամանած այլ 20 հազար փախստականներին։ ԵՄ Խորհուրդը պետք է սխեմա մշակի, որի համաձայն՝ փախստականները կբաշխվեն ԵՄ անդամ երկրներում։