«Հայաստանի Էլեկտրական Ցանցեր» ՓԲԸ-ի գլխավոր տնօրեն Եվգենի Բիբինի աշխատանքի ազատման լուրերը իրականությանը չեն համապատասխանում: Այս մասին NEWS.am-ի թղթակցին հայտնեցին ՀԷՑ մամուլի խոսնակ Նատալիա Սարջանյանը:
Նա նշեց, որ Բիբինը դեռ չի վերադարձել Հայաստան, խորհրդակցությունների մեջ է: Մեր տեղեկություններով՝ Բիբինը այս շաբաթ էլ չի վերադառնա Հայաստան: Հնարավոր է նա Երեւանում լինի մյուս շաբաթ, եթե իհարկե մինչ այդ այլ զարգացումներ չլինեն:
Ավելի վաղ հայտնել էինք, որ «Ժողովուրդ» թերթի տեղեկություններով՝ երեկ տեղի է ունեցել ՌԴ վարչապետ Դմիտրի Մեդվեդեւի եւ «Տաշիր գրուպ» ընկերության սեփականատեր Սամվել Կարապետյանի հանդիպումը: ՌԴ վարչապետի նախաձեռնությամբ տեղի ունեցած ոչ պաշտոնական այդ հանդիպման քննարկման թեման եղել է «Հայաստանի էլեկտրական ցանցեր» ընկերության հետագա ճակատագրի հարցը:
Ի դեպ, երեկ, երբ ՌԴ նախագահ Վլադիմիր Պուտինն ու Սերժ Սարգսյանը վերջինիս ծննդյան տարեդարձի առիթով հեռախոսազրույց են ունեցել, կրկին քննարկվել է ՀԷՑ-ի շուրջ Հայաստանում ստեղծված իրավիճակը: Իսկ ավելի ուշ մեզ հայտնի դարձավ, որ ՌԴ իշխանությունները որոշել են ՀԷՑ գլխավոր տնօրեն Եվգենի Բիբինին պաշտոնանկ անել. նա, հավանաբար, Մոսկվայից Երեւան այլեւս չի վերադառնա որպես տնօրեն:
