Ամուսնու կողմից ծանր հրազենային վնասվածք ստացած ծննդկանը գտնվում է նույն վիճակում, առկա է դրական դինամիկա: Այս մասին NEWS.am-ի թղթակցի հետ զրույցում ասաց Երեւանի Պերինատոլոգիայի, մանկաբարձության եւ գինեկոլոգիայի կենտրոնի ղեկավար Ռազմիկ Աբրահամյանը:
Նա նշեց, որ կնոջ վիճակը կայուն է, չի ծանրացել կամ վատացել, ինչը արդեն իսկ լավ է: Նա այժմ գտնվում է Վերակենդանացման բաժանմունքում, գիտակցություն առկա է, բայց դեղերի ազդեցությամբ է:
Բժիշկը նշեց նաեւ, որ նորածին երեխայի վիճակը եւս կայուն ծանր է: Նա ծնվել է անհաս, ունի մի շարք խնդիրներ՝ ինֆեկցիա, ներարգանդային թոքաբորբ:
Ավելի վաղ NEWS.am-ը հայտնել էր, որ Երեւանի Պերինատոլոգիայի, մանկաբարձության եւ գինեկոլոգիայի կենտրոնում հունիսի 30-ին արտակարգ դեպք է գրանցվել: Ամուսինը եկել էր հիվանդանոց, կրակել ժամեր առաջ կեսարյան հատմամբ ծննդաբերած կնոջը, ապա ինքնասպան եղել:
Մեզ հաջողվեց պարզել, որ նրանք ապրում են Դավիթաշենում, կինը՝ 27-ամյա Միլենա Ա.-ն ծննդաբերել է 8 ամսականում: Ամուսինը՝ 33-ամյա Հայկ Վ.-ն գալով հիվանդանոց տեսել էր զոքանչին եւ հարազատներին այնտեղ, ապա նրանց ուղարկել էր բուլկի գնելու եւ կրակել կնոջ պարանոցին: Ամուսինը տեղում մահացել էր, կնոջը վիրահատել են, վիճակը ծայրահեղ ծանր է, լույս աշխարհ եկած բալիկը լավ է:
