Ֆրանսիացի իսլամիստ Յունես Սեբաստիանը, որը գործել է Սիրիայում «Իսլամական պետության» ջոկատներում, հաստատել է, որ լավ ծանոթ է հունիսի 26-ին Լիոն քաղաքի մոտ գտնվող գործարանի վրա հարձակում գործած Յանիս Սալհիի հետ: Այս մասին այսօր՝ հուլիսի 1-ին հայտարարել է Յունես Սեբաստիանի մայրը «Եվրոպա-1» ռադիոկայանին տված հարցազրույցում:
Կինը պատմել է, որ ահաբեկչության օրը բջջային WhatsApp մեսինջերով կապվել է որդու հետ եւ հայտնել նրան տեղի ունեցածի մասին, ինչին որդին պատասխանել է. «Ես տեղյակ եմ, այդ մարդն ինձ եղբոր պես է: Ես եմ պատճառներից մեկը, որ դա տեղի է ունեցել»:
Հենց Յունես Սեբաստիանին է ահաբեկիչն ուղարկել հանցագործության վայրում արված լուսանկարը: Ընդ որում Յանիս Սալհին պատկերել է իրեն իր կողմից սպանված մարդու կտրված գլխի ֆոնին, իսկ կողքին եղել են երկու դրոշներ՝ իսլամիստական կարգախոսներով: