Նորվեգիայի իշխանությունները Հռոմի Կաթոլիկ եկեղեցու տեղական թեմին կասկածում են խարդախության մեջ:
Ոստիկանության ֆինանսական եւ տնտեսական հանցագործությունների բաժնի քննիչները պնդում են, որ 2010-2014 թվականներին թեմը մտածված կերպով հաշվետվություններում ուռճացրել է իր ծխականների թիվը՝ այդպիսով շուրջ 6 մլն դոլարի չափով պետական աջակցություն ստանալով:
Այս տարվա փետրվարին թեմի տարածքում ստուգումներ են անցկացվել՝ խոշոր չափերի հասնող խարդախության կասկածանքով, իսկ մի քանի օր առաջ հոգեւորականները պաշտոնական նամակ են ստացել իշխանություններից, որում պահանջվում է փոխհատուցել ստացած գումարը:
BBC-ի ռուսական ծառայության փոխանցմամբ, թեմն առայժմ հրաժարվում է վճարել: Թեմի ներկայացուցիչ Լիզա Վալդի խոսքով, փորձում է այդ հարցը կարգավորել մշակույթի նախարարության հետ:
Նորվեգիան հիմնականում բողոքական երկիր է: 2014 թվականի տվյալներով, տեղի կաթոլիկ համայնքը շուրջ 150 հազար գրանցված անդամ ունի: Ընդ որում, 2010-ին նրանց թիվը երկու անգամ քիչ է եղել: Ծխականների թվի կտրուկ աճը եկեղեցին բացատրում է կաթոլիկ երկրներից, հիմնականում՝ Լեհաստանից ներգաղթյալների հոսքով:
