Արաբկիր եւ Քանաքեռ Զեյթուն վարչական շրջանների ընդհանուր իրավասության դատարանն անհիմն դատավճիռ է կայացրել «Արաբկիր» բժշկական կենտրոնում մահացած 2-ամյա Լիա Միսակյանի մահվան գործով ամբաստանյալ, մանկաբույժ Լիլիթ Վարդանյանի նկատմամբ: Այս մասին NEWS.am-ի հետ զրույցում ասաց բժշկուհու պաշտպան Գիվի Հովհաննիսյանը՝ ավելացնելով, որ դատարանը դատավարության ընթացքում մի շարք ապօրինություններ է թույլ տվել: Նշենք, որ հունիսի 15-ին Լիլիթ Վարդանյանը դատապարտվեց 2 տարվա ազատազրկման եւ համաներմամբ ազատվեց հիմնական պատիժը կրելուց:
«Մենք արդեն ստացել ենք դատավճիռը, բայց հիմնավորումները բացակայում են: Ձեւական դատավճիռ է ուղղակի: Դատավարության ընթացքում բազմաթիվ ապօրինություններ են եղել եւ դրանց հիման վրա մեղադրական դատավճիռ կայացնելն անթույլատրելի է, բայց մենք համոզված էինք, որ մեղադրական դատավճիռ է լինելու»,-ասաց պաշտպանը:
Գիվի Հովհաննիսյանը նշեց, որ դատավճիռը ենթակա է բողոքարկման եւ մեկամսյա ժամկետում ինքը կդիմի Վերաքննիչ քրեական դատարան:
Նշենք, որ Լիա Միսակյանի գործով մյուս ամբաստանյալ, մանկաբույժ Զարինե Այվազյանը դատապարտվել է 2.5 տարվա ազատազրկման եւ համաներմամբ ազատվել է պատժի կրումից:
NEWS.am-ի հետը զրույցում ամբաստանյալի պաշտպան Երեմ Սարգսյանը նշեց, որ իրենք նույնպես համաձայն չեն դատավճռի հետ:
Պաշտպանի խոսքով՝ դատարանի որոշումը ստանալուց եւ ուսումնասիրելուց հետո, իր պաշտպանի համաձայնության դեպքում նոր միայն կդիմիՎերաքննիչ քրեական դատարան:
Հիշեցնենք, որ 2 տարեկան Լիան «Արաբկիր» բժշկական կենտրոն էր տեղափոխվել դեկտեմբերի 31-ին: Սկզբում, դեղամիջոցներ ընդունելուց հետո, փոքրիկն իրեն ավելի լավ էր զգացել, բայց մեկ օր անց նրա վիճակը վատացել է, եւ աղջնակը մահացել է: «Արաբկիր» բժշկական համալիրի մանկաբույժներ՝ 28-ամյա Լիլիթ Վարդանյանին եւ Զարինե Այվազյանին մեղադրանք է առաջադրվել Քրեական օրենսգրքի 130-րդ հոդվածի 2-րդ մասի հատկանիշներով, որը նախատեսում է ազատազրկում՝ 2-6 տարի ժամկետով, իսկ որոշ պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը 3 տարի ժամկետով: Հունիսի 15-ին գործով ամբաստանյալ բժշկուհի Լիլիթ Վարդանյանին դատարանը դատապարտեց 2, իսկ բուժքույր Զարինե Այվազյանին՝ 2,5 տարվա ազատարկման: Նշանակված պատիժը համաներմամբ չկիրառվեց, իսկ ամբաստանյալների խափանման միջոցը՝ ստորագրությունը չհեռանալու մասին որոշումը կհանվի դատավճիռը օրինական ուժի մեջ մտնելուց հետո:
