Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի հայրը պնդում է, որ իր որդու սպանության գործով մեղադրյալ Վաչե Սահակյանի փաստաբան Արմեն Նադիրյանը ստում է, հայտարարելով, որ փորձաքննությամբ որևէ ապացույց չկա, որ իր պաշտպանյալը որևէ առնչություն ունի Հայկազ Բարսեղյանի սպանության հետ։ Այս մասին NEWS.am-ի հետ զրույցում ասաց Արկադի Բարսեղյանը՝ հավելելով, որ ամեն ինչ հստակ ու պարզ է և Վաչե Սահակյանը իր որդուն սպանողներից մեկն է եղել։
«Վաչեն որդուս սպանող 4 թուրքերից մեկն է եղել, ինչպես կարելի է մարդասպանին անմեղ համարել,ավելին, նրա գլխավորությամբ է սպանությունը կատարվել։ Անհեթեթ հայտարարություններ են անում, ստի դետեկտոր են ուզում բերել, 5 ամիս է անցել երեխուս սպանությունից ու միայն հիմա է փաստաբանը հայտնվում ու հայտարարում, որ ստի դետեկտորով ուզում են ապացուցել՝ Վաչեն մեղավոր է սպանության մեջ, թե չէ։ Հիմա հանգստացել, է, կրքերը հանդարտվել են, ու մի ձևով կարող է ապացուցեն, որ դա մեղավոր չէ տղայիս սպանության մեջ, բայց ես վստահ եմ, որ նա է սպանել որդուս»,-ասաց նա։
Նշենք, որ ավելի վաղ սպանության գործով մեղադրյալ Վաչե Սահակյանի փաստաբան Արմեն Նադիրյանը NEWS.am-ի հետ զրույցում նշելէր, որ քննությամբ առայժմ պարզ է, որ կուրսանտին սպանել են, հետո կախել, բայց կոնկրետ իր պաշտպանյալի մասով փորձաքննությամբ որեւէ առնչություն չի ստացվել, որեւէ մանրաթել, արյան հետք չկա:
Հիշեցնենք, որ հունվարի 29-ին՝ ժամը 06:35-ի սահմանում Երեւանում տեղակայված ուսումնական զորամասերից մեկի մարզահրապարակում հայտնաբերվել էր նույն զորամասի 1-ին կուրսի ուսանող Հայկազ Արկադիի Բարսեղյանի դին՝ պտտաձողի վրա պարանով կախված վիճակում:
Դեպքի առթիվ ՀՀ քննչական կոմիտեի զինվորական քննչական գլխավոր վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 7-րդ կետով: Մեղադրանք է առաջադրվել Հայկազ Բարսեղյանի համածառայակիցներ Վաչե Սահակյանին, Մովսես Ազարյանին, Գնել Թեւոսյանին եւ Նորիկ Սահակյանին, նրանք կալանավորված են: