Հայաստանում աշխատելու առաջին տարիներին «Վիվասել-ՄՏՍ»-ը բառացիորեն գիշեր-ցերեկ բջջային կապ էր ստեղծում, որպեսզի այն հասանելի լինի անգամ ամենահեռավոր գյուղերում։ Այս մասին հուլիսի 1-ին՝ ընկերության 10-ամյակին նվիրված մամուլի ասուլիսի ժամանակ, լրագրողներին հայտարարեց ընկերության գլխավոր տնօրեն Ռալֆ Յիրիկյանը։
«Անգամ խոր ձմռանը լեռներում մենք կայաններ էինք դնում։ Ինչպես այսօր, այն ժամանակ նույնպես վայրկենապես արձագանքում էինք ամեն վթարի։ Բնակիչները զարմանում էին, թե որքան արագ ենք մենք տեղ հասնում։ Մենք դա անում էինք, քանի որ հավատում էինք, որ կապը մարդկանց անհրաժեշտ է եւ չպիտի ընդհատվի»,-ասաց Յրիկյանը։ Նրա խոսքով այսօր ընկերությունը DC HDSPA (3,5G) կապ է ապահովում 615 բնակավայրերում, այդ թվում՝ 48 քաղաքներում։ Իսկ 3G կապը հասանելի է բնակչության 98.8 տոկոսին։
2009թ. ընկերությունը փորձնական ռեժիմով գործարկեց 4G/LTE ցանցը՝ վայրկյանում 150 մբիթ արագությամբ։ Այսօր 4G-ն հասանելի է 250 բազային կայանների՝ Հայաստանի բնակչության 45.7 տոկոսին։
Ներկայումս «Վիվասել-ՄՏՍ»-ը Հայաստանում զբաղեցնում է հեռահաղորդակցման շուկայի 60 տոկոսից ավելին, ինչը նշանակում է 2 մլն բաժանորդ։