ԱՄՆ-ում դատարանը որոշել է, որ բավականաչափ ապացույցներ կան՝ կալիֆորնիական Բըրբենք քաղաքի բնակիչ, 41-ամյա Արտյոմ Մարտիրոսյանի գործով դատավարությունը շարունակելու համար: Ըստ «Burbank Leader»-ի, նրան մեղադրում են գիտակցված, կանխամտածված կերպով ատրճանակի կիրառմամբ սպանություն կատարելու մեջ:
Հարձակման զոհը՝ Էրիկ Աղասյանը, ասել է, որ անցյալ տարվա նոյեմբերին Մարտիրոսյանը հետեւել է իրեն, իր տան առջեւ դուրս է եկել ավտոմեքենայից եւ չորս անգամ կրակել իր ուղղությամբ, ինչի հետեւանքով ինքը հրազենային երեք վիրավորում է ստացել:
Սակայն նրանց հարաբերությունները վատացել են այդ միջադեպից ամիսներ առաջ: Աղասյանը պնդում է, որ Մարտիրոսյանն իրեն 28 հազար դոլար է պարտք այն բանից հետո, երբ ընդհանուր ջանքերով գույքի վաճառքի գործարքը հաջողությամբ չի պսակվել: Բացի այդ, Աղասյանը վիրավորվել է, երբ Մարտիրոսյանն իրենց ընդհանուր ընկերոջն ասել է, որ Հայաստանում Աղասյանին նույնասեռականի հետ է տեսել:
Դատարանի դահլիճից Մարտիրոսյանի փաստաբան Ալեքս Քեսսելն ասել է, որ իր հաճախորդն ընդամենը պաշտպանվել է: Մարտիրոսյանը կրկին դատարանի առջեւ կկանգնի այս ամսվա վերջին:
Ավելի վաղ NEWS.am-ը տեղեկացրել է, որ Գլենդելի բնակիչ Էրիկ Աղասյանը հայտարարել է, որ իր գործընկեր Արտյոմ Մարտիրոսյանը չորս անգամ կրակել է իր ուղղությամբ:
