Բաղրամյան պողոտայում ցույցի մասնակիցների համար այս պահին ելույթ են ունենում «The Small bodies» խմբի երաժիշտները:
Հիշեցնենք, որ մինչ այդ Բաղրամյան պողոտայում մի պահ միացրեցին եւ կրկին անջատեցին բեմի հարեւանությամբ գտնվող շենքի հոսանքը, որից ակտիվիստները միացնում են իրենց բարձրախոսները:
Ելույթի կարճատեւ հնարավորություն ունեցած նստացույցի համակարգողներից, ակտիվիստ Դավիթ Սանասարյանը հայտնեց, որ քրեական գործ է հարուցվել Գյումրիի ակտիվիստներից Կարեն Պետրոսյանի դեմ` խուլիգանության մեղադրանքով:
Մինչ այդ, ակտիվիստներն «Ամո՛թ, ամո՛թ» էին գոչում՝ ոստիկանությանը մեղադրելով միտումնավոր կերպով հոսանքն անջատելու մեջ: Նրանք նաեւ հայտարարում են, որ շարունակելու են պայքարել եւ հաղթանակելու են իրենց պայքարում:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում՝ ընդդեմ էլեկտրաէներգիայի սակագնի բարձրացման։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, սակայն մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։