Երեւանի Բաղրամյան պողոտայում, որտեղ այս պահին ընթանում է էլեկտրաէներգիայի սակագնի թանկացման դեմ պայքարող քաղաքացիների նստացույցը, քիչ առաջ ծննդյան տարեդարձ նշեցին: NEWS.am-ի թղթակցի փոխանցմամբ, ցուցարարներից Սոնա Հովակիմյանի ընկերները նրա 28-ամյակի առիթով խմորողեն էին բերել Բաղրամյան պողոտա՝ այդ կերպ շնորհավորելով նրա տարեդարձը:

Սոնա Հովակիմյանը NEWS.am-ի թղթակցի հետ զրույցում նշեց, որ մինչ այդ տարեդարձն ընկերների հետ նշել է, իսկ հետո որոշել են Բաղրամյան գալ:

«Երբեք չէի պատկերացնի, որ ծնունդս այս կերպ կնշեմ: Պարզապես ընկերներով որոշեցինք այստեղ գալ՝ երեկոն նստացույցի վայրում անցկացնելու համար»,- ասաց Սոնան:

Նշենք, որ այս պահին ցուցարարներն ազգագրական երգեր են կատարում եւ պարում են: Նստացույցի վայրում պատ կազմած ոստիկաններ չկան: Փոխարենը ոստիկանական ջրցան մեքենաներն ու զրահամեքենաները դեռեւս Բաղրամյանում են, իսկ իրավապահները պարբերական շրջում են տարածքում: Չկա նաեւ ցուցարարների եւ ոստիկանների միջեւ պատգամավորների, հասարակական գործիչների եւ շոու-բիզնեսի ներկայացուցիչների կազմած կենդանի պատը:

Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում՝ ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունն ուժով ցրեց նստացույցը, բերման ենթարկեց 237 քաղաքացու, բայց երեկոյան բողոքի ակցիան վերսկսվեց:

Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, սակայն մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։

Հավելենք նաեւ, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոքի ակցիաներին հունիսի 17-ին, ՀԾԿՀ-ի նիստում հաստատվել է էլեկտրաէներգիայի նոր սակագինը։ Էլեկտրաէներգիան թանկացել է 6.93 դրամով՝ 1 կՎտ/ժ-ի դիմաց, 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունն առաջարկել էր էլեկտրաէներգիայի 1 կՎտ/ժ-ը թանկացնել 17 դրամով:

Լուսանկարները՝ Արսեն Սարգսյանի/NEWS.am