Բաղրամյան պողոտայում ամենամտահոգիչ միջադեպերը տեղի են ունեցել հունիսի 23-ին, որոնց վերաբերյալ ՀՀ Մարդու իրավունքների պաշտպանը հանդես կգա որոշման տեսքով: Այս մասին այսօր՝ հուլիսի 2-ին, լրագրողների հետ զրույցում ասել է ՀՀ Մարդու իրավունքների պաշտպան Կարեն Անդրեասյանը՝ հավելելով, որ եթե երկուշաբթի չլինի ոստիկանության սպառիչ եւ բավարար պատասխանը, ապա իր որոշումը կհրապարակի առանց ոստիկանության պատասխանի:
Նրա խոսքով, այդ որոշման մեջ գնահատական կտրվի լրագրողների նկատմամբ կիրառված գործողություններին, առանց համազգեստի ոստիկաններին:
Անդրադառնալով հարցին, թե ինչի՞ արդյունք է այն, որ ոստիկանությունը պարբերաբար հայտարարում էր, որ ուժով կազատի Բաղրամյան պողոտան, սակայն մինչ այժմ չի ձեռնարկել նման միջոցառումներ, օմբուդսմենը պատասխանել է. «Մենք ուրախ ենք, որ ոստիկանությունը հանդուրժողականություն է դրսեւորել այսքան օր՝ անկախ առանձին ձեւակերպումներից կամ առանձին դրդեւորումներից: Նաեւ դրական ենք գնահատում ցուցարարների խաղաղ, առանց որեւէ միջադեպերի վարքագիծը, եւ ողջունում ենք երկու կողմերում էլ բոլոր դրական դրսեւորումները»:
Ինչ վերաբերում է քաղաքացիական հագուստով ոստիկաններին՝ Կարեն Անդրեասյանն ասել է. «Բազմաթիվ անգամներ եմ շեշտել, որ առանց համազգեստի ոստիկանների գործունեությունը նման վայրերում խիստ անթույլատրելի է եւ անընդունելի: Եվ նաեւ կշեշտեի, որ նույնիսկ եթե ընդհանուր գործունեությունը դրական գնահատվի, նման էպիզոդները՝ ոչ համազգեստով, առանձին, կասկածելի տեսք եւ վարքագիծ ունեցող անձանց նման սուր իրավիճակներում, այսինքն՝ ցույցների, հավաքների վայրերում խիստ անթույլատրելի է»:
Կարեն Անդրեասյանը խուսափել է գնահատական տալ ՀՀ ոստիկանապետ Վլադիմիր Գասպարյանի վերջին օրերի վարքին՝ նշելով, որ անհատական գնահատականներ չի ցանկանում տալ, քանի որ դրանք զուտ մարդկային գնահատականների դաշտում են:
