Հայաստանի էներգետիկ համակարգի շատ կախվածությունը շատ մեծ է Ռուսաստանից: Այս մասին այսօր՝ հուլիսի 2-ին, լրագրողներին ասաց ԵՊՏՀ դոցենտ, տնտեսագետ Աշոտ Եղիազարյանը:
«Քանի դեռ Հայաստանը ԵՏՄ անդամ է, տնտեսական, թե այլ խնդիրներ չենք կարող լուծել»,-ասաց նա եւ նշեց, որ մեր էներգետիկ համակարգում կան լուրջ խնդիրներ եւ անհրաժեշտ են լուրջ ներդրումներ, ինչը հնարավոր է արեւմտյան երկրների հետ համագործակցության շրջանակում, սակայն դա էլ բացառվում է ԵՏՄ շրջանակում:
Տնտեսագետը նշեց, որ Հայաստանն ի վիճակի չէ ինքնուրույն որոշում կայացնելու եւ պետք ենթարկվի ԵՏՄ ընդհանուր շահերին, հավելելով, որ Հայաստանը իր էներգետիկ քաղաքականությունը վերջին 15 տարիների ընթացքում հանձնել է ռուսական էներգետիկ ընկերություններին։
Աշոտ Եղիազարյանը տեղեկացրեց նաեւ, որ ԵՏՄ շրջանակում նախատեսված է միասնական էներգետիկ շուկա ունենալը, որը հավանաբար կգործի 2019 թվականին:
Ըստ Աշոտ Եղիազարյանի իրատեսական չէ նաեւ ՀԷՑ-ի ազգայնացումը:
«ՀԷՑ-ն իսկապես պետք է տրվի կառավարման այն ընկերություններին, որոնք ունեն տեխնոլոգիական հնարավորություններ եւ ֆինանսական միջոցներ: Նոր հզորությունն են պետք, եղածը արդեն իրենց դարն անցել են, սակայն մենք այլընտրանք չունենք, քանի որ ԵՏՄ անդամ ենք: Մինչ Հայաստանը դուրս չգա ԵՏՄ-ից, խնդիրները մտնում են փակուղի, ԵՏՄ-ն Հայաստանի համար միշտ եղել է փակուղի»,- ասաց նա նշելով, որ անհրաժեշտ է ՀԷՑ-ը ազգայնացնել եւ տալ արեւմտյան արդյունավետ մենեջմենթ իրականացնող ընկերության:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: