«Երրորդմասցի Լյովիկի» սպանությունից հետո առավել հայտնի դարձած Դավիթ Իսպիրյանի գործով բեկում է եղել: NEWS.am-ի տեղեկություններով՝ Արաբկիր եւ Քանաքեռ-Զեյթուն ընդհանուր իրավասության դատարանում քննվող գործի շրջանակներում դատախազը փոխել է մեղադրանքը՝ էականորեն մեղմացնելով այն:
Նրա փաստաբան Երեմ Սարգսյանը NEWS.am-ի թղթակցի հետ զրույցում ասաց, որ այդ հոդվածների անհիմն լինելու վերաբերյալ իրենք բարձրաձայնել էին դեռ նախաքննության ընթացքում, համապատասխան միջնորդությամբ էին հանդես եկել՝ արարքը վերաորակելու առումով, սակայն միջնորդությունը մերժվել է: Դատաքննության ընթացքում փաստերի հետազոտման ժամանակ պարզվել է դրանց անհիմն լինելու, դատախազը միջնորդել է փոխել մեղադրանքը՝ հանելով ՔՕ-ի 34- 104-րդ հոդվածի 2-րդ մասը, հրաժարվել է նաեւ խուլիգանության մեղադրանքից, այժմ Դավիթ Իսպիրյանը մեղադրվում է սպանության փորձի, ապօրինի զենք կրելու եւ ապօրինի սահմանը հատելու համար:
Հիշեցնենք, որ Դավիթ Իսպիրյանը 2011թ Կիևյան փող. 2բ շենքի բակում կոպիտ կերպով խախտել է հասարակական կարգը, ապա Արթուր Ղալումյանին կյանքից ապօրինաբար զրկելու դիտավորությամբ, խուլիգանական դրդումներով, իր կողմից ապօրինի կերպով կրակվող հրազենով, կրակել է նրա ուղղությամբ, սակայն հանցագործությունն ավարտին չի հասցրել իր կամքից անկախ հանգամանքներով։ Դրանից բացի՝ 2015թ նա Ուկրաինայի հանրապետության քաղաքացու կեղծ անձնագրով ապօրինի հատել է Հայաստանի Հանրապետության պահպանվող պետական սահմանը և մուտք գործել ՀՀ տարածք։ Դատախազը խնդրել է նիստեր նշանակել մինչեւ օգոստոս ամիսը՝ իր ամենամյա արձակուրդ մեկնելը:
Ի դեպ, Դավիթ Իսպիրյանը հենց այն երիտասարդն է, ում մոտ այցելել էր «Երրորդմասցի Լյովիկը» սպանության օրը: Նա «Արաբկիրցի Վլադի» որդին է եւ նրանց է պատկանում «Հաղթանակ» զբոսայգում գործող «Իսպիրնոց» կոչվող խորտկարանը։