Բելգիայի ներկայացուցիչների պալատի Սոցիալիստական կուսակցությունը Հայոց ցեղասպանության ճանաչման սեփական բանաձեւն է առաջ քաշել։ Այս մասին գրում է «La Libre»-ն։
Սոցիալիստական կուսակցությունն ու նրա պատգամավորները ցանկանում են այդ նախագծով Հայոց ցեղասպանության հարցում իրենց դիրքորոշման մասին հստակ ուղերձ ուղարկել՝ միաժամանակ հանդես գալով հայկական եւ թուրքական համայնքների մերձեցման օգտին։ Ինչպես նշված է նախագծի տեքստում, խորհրդարանը կարծում է, որ 1915-1917թթ. ողբերգական դեպքերը, որոնց պատասխանատվությունն ընկած է Օսմանյան կայսրության ուսերին, պետք է որակվեն որպես ցեղասպանություն։
Սոցիալիստների խմբակցությունը, սակայն, նշում է, որ խորհրդարանի կողմից այս ճանաչումը իրավական հետեւանքներ չունի։ Ըստ բանաձեւի՝ Պալատը կոչված չէ փոխարինելու դատական մարմինը, որն իրավասու է որոշում կայացնել այդ դեպքերի իրավական բնութագրի համար։ «Պալատը հանդիսավոր կերպով քաղաքական ակտ է իրականացնում՝ ճանաչելով որ հայերի զանգվածային սպանությունները համապատասխանում են ցեղասպանություն եզրին, որը սահմանում է ՄԱԿ 1948թ. Կոնվենցիան»,-ասված է տեքստում, որը նաեւ կոչ է անում ազգային եւ միջազգային դատական մարմիններին որոշում կայացնել այդ հարցով։
Բանաձեւի հեղինակները իրենց նախաձեռնությունն առաջ են քաշում «թուրքերի եւ հայերի նկատմամբ աջակցության եւ բարեկամության ոգով, ինչպես նաեւ դատապարտում են համայնքներին պիտակելը, որոնք չեն կարող կապ ունենալ 100 տարի առաջ Օսմանյան կայսրությունում տեղի ունեցածի հետ»։ Բանաձեւի տակ ստորագրել է նաեւ թուրք պատգամավոր Օզլեմ Օզենը, ինչպես նաեւ պատգամավորներ Ստեֆան Կրյուները, Ֆիլիպ Բլանշարը, Գվենաել Գրովոնիուսը։
Նշենք, որ Հայոց ցեղասպանության մասին բանաձեւի նախագիծը պատրաստել էր Բելգիայի խորհրդարանական մեծամասնությունը։ Սակայն ընդդիմադիր ուժերի ներկայացուցիչները առաջարկել էին փոփոխություններ մտցնել տեքստում։
Հիշենենք, որ ավելի վաղ Բելգիայի վարչապետը խորհրդարանում իր կառավարության անունից ճանաչել էր Հայոց ցեղասպանությունը՝ հայտարարելով, որ 1915-1917 թթ. ողբերգական իրադարձությունները, որոնք նախաձեռնել էր Օսմանյան Կայսրության վերջին կառավարությունը, պետք է որակվեն որպես ցեղասպանություն։