«Դուրս մեր գրպանից» նախաձեռնությունը հուլիսի 5-ին ավտոերթ կանցկացնի՝ ի աջակցություն Բաղրամյան պողոտայում նստացույց անող ցուցարարների: Այս մասին այսօր՝ հուլիսի 2-ին, լրագրողներին ասաց նախաձեռնության անդամ Վարդան Հակոբյանը:
«Նպատակը մեկն է, հանկարծ այս կեղեքող ռեժիմը չմտածի, որ այդ մի քանի հազար մարդն է, որ պարբերաբար հավաքվում է Բաղրամյան պողոտայում: եսվստահ եմ, որ ընդհանուր հաղթանակը հեռու չէ, սակայն սա արդեն հաղթանակ եմ համարում: Մենք ուզում ենք՝ ավելի լայն շերտեր ներգարվվել այս պայքարի մեջ»,-ասաց նա:
Ինչ վերաբերում է շարժման քաղաքականացմանը որոշակի ուժերի կողմից, «Դուրս մեր գրպանից» նախաձեռնության անդամները վստահ են՝ սա չի համապատասխանում իրականությանը, քանի որ ոչ մի քաղաքական ուժ չի փորձում ղեկավարել կառավարումը, բոլորն էլ վստահում են շարժումն ուղղորդող երիտասարդներին:
Նախաձեռնության անդամ Արթուր Կրոյանն էլ նշեց, որ թեև ոստիկանությունը ներկայացղնում է, որ հարակից շենքերի բնակիչները բոսղոքում են ցուցարներից, սակայն դա ոստիկաններն են այդպես ներկայացնում:
«Մեզ հասել են նաև շշուկներ, որ որոշ կազմակերպություններ արգելքներ են դնում աշխատողների վրա՝ թույլ չտալով գնալ Բաղրամյան: Ամեն դեպքում, պայքարող մասսան միայն Բաղրամյանով չի սահմանափակում: Մենք մեր ավտոերթը կիրակի օրն ենք որոշել անցկացնել, որպեսզի բոլոր այն մարդիկ, ովքեր զբաղվածության կամ այլ պատճառներով չեն կարողանում գալ Բաղրամյան, գան և միանան մեզ՝ շարժմանն իրենց աջակցությունը ցույց տալով»,-եզրափակեց Կրոյանը:
Նշենք, որ իրազեկման ավտոերթը կմեկնարկի Նոր Նորքի 6-րդ զանգվածից և կշարժվի դեպի Զեյթուն, Կոմիտաս, Լենինգրադյան փողոց և կավարտվի Բրազիլիայի հրապարակում:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
