Հայաստանի արտաքին պարտքն իրականում 12-13 մլրդ դոլար է: Այս մասին այսօր՝ հուլիսի 2-ին, ԱԺ-ում ՌԴ-ի կողմից Հայաստանին 200 մլն դոլարի ապրանքային վարկ տրամադրելու (պաշտպանական նպատակներով) մասին պայմանագրի քննարկման ժամանակ հայտարարել է ՀԱԿ խմբակցության պատգամավոր, նախկին վարչապետ Հրանտ Բագրատյանը:
Նրա խոսքով, այդ պարտքից միայն 4,6 մլրդ դոլարը կառավարության եւ ԿԲ-ի պարտքերն են: «Մենք տվել ենք երաշխիքներ, որոնք դժբախտաբար ոչ ոք չգիտի՝ ինչքան են: Օրինակ Նաիրիտը՝ 450 մլն դոլար, ՀԷՑ-ը՝ 280 մլն դոլար: Մենք առաջարկել ենք, որ այս բոլոր պետական երաշխիքները եւս համարվեն պետական պարտք, որը չի ընդունվել: Բացի այդ, ոչ ոք չգիտի ձեռնարկությունների ու բանկերի արտաքին պարտքը, որը եւս պետք է մտցվի արտաքին համախմբված պարտքի մեջ»,-ընդգծել է Բագրատյանը:
Նրա խոսքով ապակողմնորոշիչ է նաեւ, երբ հայտարարում են, որ արտաքին պարքտը կազմում է ՀՆԱ 60 տոկոսը եւ դա վատ չէ: «Ես հիշում եմ, որ 10 տարի առաջ ասում էին 25 տոկոս է պարտքը, վատ չի: Բարեկամներ արտաքին պարտքի գնահատման երեք մեթոդ կա: Այդ 60 տոկոսը ստացվել է մեթոդներից մեկով: Իսկ ամենակարեւոր մեթոդն այն է, թե այդ պարտքը ինչ հարաբերության մեջ է գտնվում արտահանման պոտենցիալի հետ: Մեր համախառն արտաքին պարտքը սպասարկելու համար, իմ գնահատմամբ պետք է տարեկան 100-110 մլն դոլար: Վերջին տարիներին երկրի արտահանման ծավալը 1,9 մլրդ դոլարից նվազել է 1 միլիարդի»,-ընդգծել է նախկին վարչապետը՝ նկատելով, որ կան երկրներ, որոնք ՀՆԱ-ից էլ շատ արտաքին պարտք ունեն, բայց վճարունակ են, օրինակ Ճապոնիան, եւ կան երկրներ, որոնք արտաքին պարտքը 50 տոկոս է, բայց նրանք անվճարունակ են: «Հայաստանում այսօր այդ առումով վիճակն աղետալի է»,-ամփոփել է նա: