Հայաստանը չի հրաժարվում եւ չի հրաժարվելու վճարել ռուսական սպառազինության դիմաց: Այս մասին այսօր՝ հուլիսի 2-ին, ԱԺ արտահերթ նստաշրջանում հայտարարել է ԱԺ փոխնախագահ, ՀՀԿ խմբակցության անդամ Հերմինե Նաղդալյանը:
Նա նշել է, որ վարկային համաձայնագիրը, որը քննարկվում է ԱԺ նիստում, պետք է ֆինանսավորի նոր ռուսական ռազմական տեխնիկայի գնումը գործարանային գներով, որը նախատեսված է բացառապես ռուսական բանակի համար:
«Ինչ-որ մեկն ասում է, որ Ռուսաստանը նույնպիսի զինատեսակներ է տրամադրում Ադրբեջանին: Այո, տրամադրում է, բայց ավելի ոչ շահեկան պայմաններով»,-ընդգծել է Նաղդալյանը: Նրա խոսքով, Հայաստանը հիմա նույնպես ռուսական զենք է գնում արտոնյալ պայմաններով, բայց բոլոր դեպքերում պարտավոր է դրանց համար միանգամից վճարել:
«Հիմա մենք պետք է ցածր գնով վճարենք 10 տոկոսը, որից հետո երեք տարի կվճարենք տոկոսները եւ միայն դրանից հետո 10 տարվա ընթացքում կվճարենք արտոնյալ վարկի հիմնական գումարը»,-նշել է Նաղդալյանը:
«Նման ձեռնտու պայմաններից հետո խելամիտ չէր լինի հրաժարվել ընդհանրապես վճարելուց: Մենք երբեք չենք հրաժարվել վճարելուց եւ չենք ուշացրել այն: Դրանով մեր երկիրը սոլիդ գործընկերոջ վարկ է ձեռք բերել»,-ամփոփել է ԱԺ փոխնախագահը:
