Կայացել է Հայաստանի 4-րդ միջազգային բժշկական համագումարի բացման հանդիսավոր արարողությունը: Համագումարին մասնակցում են միջազգային ճանաչում ունեցող փորձագետներ, առողջապահության ոլորտի մասնագետներ, Սփյուռքից ժամանած հայ բժիշկներ եւ բուժքույրեր:
ՎիվաՍել-ՄՏՍ-ը, որպես գլխավոր գործընկեր, համագումարի իրականացման համար տրամադրել է 10 մլն դրամ:
4-րդ համագումարի շրջանակներում բանախոսները եւ մասնակիցները կանդրադառնան մեր օրերում առողջապահությանն առնչվող կարեւոր հիմնախնդիրներին: Մասնավորապես՝ կներկայացվեն ընդհանուր բժշկության, վիրաբուժության, ատամնաբուժության, բուժքույրական գործի, առողջապահական կրթության, էթիկայի, այլընտրանքային բժշկության ոլորտներում տեղի ունեցող զարգացումները, ինչպես նաեւ կքննարկվեն հարակից բազմաթիվ ոլորտներին առնչվող այլ խնդիրներ:
Համագումարին մասնակցելու հայտ է ներկայացրել շուրջ 500 ներկայացուցիչ՝ Հայաստանից եւ 16 այլ երկրներից: Ակնկալվում է, որ սատելիտային սիմպոզիումներին կմասնակցի 1500-2000 մասնագետ: