Հայաստանին նոր ռուսական զենքը օդի պես պետք է: Այս մասին, այսօր՝ հուլիսի 2-ին, ԱԺ-ում հայտարարել է «Ժառանգություն» խմբակցության ղեկավար Ռուբեն Հակոբյանը: Նշենք, որ ԱԺ արտահերթ նստաշրջանում քննարկվում է Ռուսաստանից 200 մլն դոլարի արտոնյակ վարկի մասին պայմանագիրը՝ սպառազինություն գնելու նպատակով:
Նրա խոսքով, ցավոք, նախկինում Ռուսաստանի հետ բազմաթիվ համաձայնագրեր են կնքվել, որտեղ Հայաստանին վերապահված է եղել վասալի դերը, բայց այս պայմանագիրը հավասար դաշնակիցների փաստաթուղթ է:
Ռուբեն Հակոբյանը նշել է, որ իհարկե, հնարավոր չէ անտեսել Ադրբեջանին ռուսական զենքի վաճառքի փաստը եւ ինքը բազմիցս որպես Հայաստան-Ռուսաստան բարեկամության խմբի անդամ բարձրացրել է այդ հարցը ռուս գործընկերների առջեւ:
«Իհարկե, որպես արդարացում նշում են, թե դա բիզնես է: Եղել են նաեւ ներողություններ, բայց ցավոք, այդ իրավիճակը փոխել հնարավոր չէ, ստիպված ենք դա խոստովանել: Իսկ այս պայմանագրով նախատեսված զենքը մեզ օդի ու ջրի պես պետք է: Օգտվելով պատգամավորի իրավունքից, ես ծանոթացել են պայմանագրի թիվ 2 հավելվածին՝ կապված զենքի տեսակների հետ եւ ուզում եմ ընդգծել, որ այս սպառազինությունը մեզ օդի պես պետք է»,-հայտարարել է Հակոբյանը:
