Հայտնի դերասան Հովհաննես Ազոյանը ֆեյսբուքյան իր էջում գրել է. «Կուզեի Հունան Պողոսյանին տեսնել Հայաստանի Հանրապետության գլխավոր ոստիկանապետի պաշտոնում»:

Ավելի ուշ նա նաեւ գրել է. «Կարծում եմ՝ Բաղրամյան պողոտան այնքան ժամանակ փակ կլինի, մինչեւ իշխանությունը՝ առանց կեղծելու չբավարարի ժողովրդի պահանջը, եւ այսուհետ պետք է փոխի երկրի կառավարման իր հնացած ու անպետք ավանդույթները… սա հիանալի շանս է նորագույն երկիր ստեղծելու… սթափվեք»:

Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։

Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: