Բաղրամյան պողոտայում հունիսի 30-ին հացադուլ հայտարարած ցուցարարներ Հարություն Հարությունյանն ու Հայկ Պարիկյանը քիչ առաջ վերադարձել են Բաղրամյան պողոտա եւ միացել նստացույցին: Այս մասին NEWS.am-ի հետ զրույցում ասաց հացադուլն այսօր դադարեցրած Հարություն Հարությունյանը` հավելելով, որ հացադուլն այլեւս չեն շարունակելու բժիշկների խորհրդով:

«Մեր առողջական վիճակը վատացել էր, այդ վիճակով մեզ հիվանդանոց տեղափոխեցին: Բժիշկներն արգելեցին մեզ հացադուլ անել, ուստի մենք մեր բողոքը կշարունակենք արտահայտել նստացույցին մասնակցելով: Այսօր այստեղ չենք գիշերի, բայց վաղվանից, եթե մեր առողջական վիճակը թույլ տա, կգիշերենք Բաղրամյան պողոտայում»,- ասաց Հարություն Հարությունյանը:

Նշենք, որ Հարություն Հարությունյանը եւ Հայկ Պարիկյանը հունիսի 30-ին անժամկետ հացադուլ էին հայտարարել: Նրանք գիշերում էին Բաղրամյան պողոտայում:

Ավելի վաղ հաղորդել էինք, որ հացադուլավոր երիտասարդներին առողջական խնդիրների պատճառով տեղափոխել էին հիվանդանոց:

Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։

Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: