ԱԻՄ առաջնորդ Պարույր Հայրիկյանը քիչ առաջ մի քանի համակիրների հետ Հայաստանի եւ Եվրամիության դրոշներով ժամանեց Բաղրամյան պողոտա: Ցուցարարները վրդովված բացականչում են «Հեռացի՛ր» եւ Պարույր Հայրիկյանին հորդորում տանել ԵՄ դրոշը: Ցուցարարները Հայրիկյանի այս քայլը սադրանք են որակում:

ԱԻՄ առաջնորդն իր քայլը մեկնաբանում է այն հանգամանքով, որ հունիսի 23-ին ոստիկանների կողմից բռնության ենթարկվածները դիմել են Մարդու իրավունքների եվրոպական դատարան:

Լրատվամիջոցների դիտարկումներին, թե այս քայլը սադրանք չէ՞ եւ առիթ չի՞ տա արտասահմանյան, մասնավորապես՝ ռուսական լրատվամիջոցներին Բաղրամյանի ցույցերը մեկնաբանել որպես հայկական մայդան, Հայրիկյանը նշեց, որ դա իրեն չի հետաքրքրում:

NEWS.am-ի թղթակիցը հաղորդում է, որ լարվածությունը ցուցարարների եւ Պարույր Հայրիկյանի համակիրների միջեւ չի դադարում, մի պահ նույնիսկ քաշքշոց է առաջացել: Ցուցարարները շուրջպար են բռնել Հայրիկյանի շուրջը եւ վանկարկում են «Հայաստան»: ԱԻՄ առաջնորդը շարունակում է մնալ պողոտայում:

Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։

Լուսանկարները Արսեն Սարգսյանի/NEWS.am