Ռուսական կողմը որեւէ իրավունք չուներ ոչ միայն քննություն իրականացնելու, այլեւ իր մոտ պահելու Գյումրիում Ավետիսյանների սպանության մեջ մեղադրվող Վալերի Պերմյակովին: Այս մասին այսօր`հուլիսի 3-ին, լրագրողներին ասաց Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան, Ավետիսյանների ընտանիքի սպանության գործով տուժողի իրավահաջորդի ներկայացուցիչ Արթուր Սաքունցը`անդրադառնալով Ավետիսյանների սպանության գործը ՀՀ քննչական կոմիտեին հանձնելու որոշմանը:
Սաքունցի խոսքով` իրականում ոչ թե Պերմյակովն է հանձնվել հայ իրավապահներին, այլ սպանության գործով փաստաթղթերը:
«Մեր հիմնական պահանջը եղել է Պերմյակովի հանձնումը հայկական կողմին: Դրա փոխարեն ռուսական կողմը մեզ փոխանցում է Պերմյակովի գործի թղթերը: Մարդու փոխարեն մեզ տալիս են թղթեր»,-ասաց նա:
Արթուր Սաքունցի կարծիքով` իշխանությունների վերաբերմունքը արհամարհանք էր Ավետիսյանների ընտանիքի հանդեպ, իսկ նախագահի միջամտությունը քրեական գործին անթույլատրելի է. «Սերժ Սարգսյանը կատարում է դատախազի՞, թե՞ քննիչի աշխատանք: Այնպիսի տպավորություն է, որ Հայաստանում չկա դատախազ»:
Հիշեցնենք, որ օրեր առաջ Ավետիսյանների սպանության գործի վարույթը եւ ռուս զինծառայող Վալերի Պերմյակովին Հայաստանի իրավապահներին հանձնելու որոշում է կայացվել:
Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր: Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Մինչեւ օրս հարազատների համար անհայտ են սպանության պատճառները: Նրանց համար կասկածելի է նաեւ սպանության մեջ մեղադրվող անձը, արդյո՞ք նա միայնակ է գործել եւ ինչպես է կարողացել միայնակ սպանել ընտանիքի 7 անդամներին:
