ՀՀ իշխանությունները պետք է գիտակցեն, որ հայկական քաղաքական իրողության մեջ ի հայտ եկած նոր ֆենոմենի՝ նոր երիտասարդական կազմակերպության հետ հաշվի չնստելը նշանակում է հայտնվել լուսանցքային դերում: Այս մասին հուլիսի 3-ին կայացած մամուլի ասուլիսի ժամանակ հայտարարեց Ռուս-հայկական (Սլավոնական) համալսարանի Համաշխարհային քաղաքականության եւ միջազգային հարաբերությունների ամբիոնի վարիչ Արման Նավասարդյանը՝ անդրադառնալով Բաղրամյան պողոտայի ցույցերին:
Նրա խոսքով՝ այն, ինչ հիմա կատարվում է Հայաստանում, պետք է անպայման դիտարկել այն իրողության հետ, որը այսօր գոյություն ունի ողջ աշխարհում: «Ես նկատի ունեմ գլոբալիզացիայի, ինտեգրացիոն շարժման խնդիրները, որոնք ընթանում են երկու բլոկերի առճակատման ֆոնին: Նկատվում է շատ հետաքրքիր երեւույթ, որը ես անպայման կկապեի հայկական իրադարձությունների հետ: Ընթանում է նոր աշխարհակարգ ձեւավորելու գործընթաց, որի ժամանակ ոչ միայն Հայաստանում, այլ նաեւ ողջ աշխարհում արտաքին եւ ներքին քաղաքականությունն այնքան են իրար մոտենում, որ նրանց միջեւ եղած պատը վերանում է»,- նշեց Նավասարդյանը եւ հավելեց, որ այս իրավիճակում բոլորովին նոր խաղացողներ են ի հայտ գալիս: «Դրանք ամենատարբեր ոչ պետական մեխանիզմներն ու կառույցներն են: Ամենակարեւոր խաղացողներից մեկը լրատվամիջոցներն են, որոնք անմիջական մասնակցություն ունեն այդ գործընթացին»,- ասաց Նավասարդյանը: