Վարորդների ճանապարհային խախտումների տուգանքների համաներման ժամկետը ավարտվում է, սակայն վարորդների մի մասը դեռ չի հասցրել օգտվել համաներումից, քանի որ իրազեկման խնդիր կա: Այս մասին այսօր`հուլիսի 3-ին, լրագրողներին ասաց «Աքիլես» ԱԻՊԿ ՀԿ իրավաբան Արմինե Մկրտչյանը:
«Հունվարի 9-ից ուժի մեջ մտավ, որ վարորդները պետք է վճարեն տուգանքների մայր գումարը, այլ ոչ թե ԴԱՀԿ-ի տուգանքները միասին, սակայն «Աքիլես» ՀԿ-ին մի շարք վարորդներ ահազանգում են, որ տեղյակ չեն եղել ժամկետներից»,- ասաց Արմինե Մկրտչյանը:
«Աքիլես» ԱԻՊԿ ՀԿ նախագահ Էդուարդ Հովհաննիսյանն էլ նշեց, որ եթե այս ընթացքում իրազեկումը պատշաճ մակարդակի չլինի, ապա այն դժգոհություն կառաջանա և կավելացնի վրդովմունքը հասարակության մեջ:
«Քաղաքացիների պակաս իրազեկված լինելու դեպքում օրենքի կիրառումը հակասահմանադրական է»,-հավելեց նա:
Էդուարդ Հովհաննիսյանն անդրադարձավ նաեւ ճանապարհային երթևեկության ծուղակներին, որոնց պատճառով վարորդները տուգանվում են:
«Կոչ ենք անում վարորդներին, որ թերությունների և ծուղակների հետևանքով տուգանվելու դեպքում դիմեն դատարան, քանի որ 2008 թվականից այս վիճակն է, իսկ խնդրով չեն զբաղվում: Խնդիրը քաղաքապետարանի և ոստիկանության իրավասությունների շրջանակում է, սակայն քաղաքապատերանն ասում է, որ այդ հարցով կարող է զբաղվել, երբ իրեն պատվիրեն, իսկ Ճանապարհային ոստիկանությունն էլ պարզապես այդ հարցով չի զբաղվում, նրանք միմյանց վրա են գցում խնդրի կարգավորումը»,- ասաց Էդուարդ Հովհաննիսյանը:
«Աքիլես» ԱԻՊԿ ՀԿ իրավաբան Արմինե Մկրտչյանն էլ նշեց, որ Հայաստանում ճանապարհային գծանշումները, նշանները, լուսացույցները տեղադրվում են ոչ թե օրենսդրության պահանջներին համապատասխան, այլ ըստ ՃՈ հարմարության:
«Հենց այս մոտեցումն է վթարների, տուգանքների և այս ոլորտում քաոսային իրավիճակի հիմքը: Մենք մի քանի նմանատիպ գործերով դիմել ենք դատարան և ունենք երկու շահած գործ, ինչը, կարելի է ասել, նախադեպային է»,- ասաց նա:
