Հայ պատգամավորները Բելառուսում կոչ են արել չքաղաքականացնել Երեւանում էլեկտրաէներգիայի սակագնի բարձրացման դեմ բողոքի ցույցերը:
Այս մասին հուլիսի 3-ին ՀՀ խորհրդարանում հայտարարեց ԱԺ փոխխոսնակ Էդուարդ Շարմազանովը՝ ամփոփելով հայ պատվիրակության՝ Բելառուս կատարած այցը, որի շրջանակներում հունիսի 29-ին հայկական կողմը մասնակցել էր հայ-բելառուսական միջխորհրդարանական բարեկամության խմբի նիստին:
Նրա խոսքով՝ արտասահմանյան մամուլում նկատվում էր հարցը քաղաքականացնելու միտում, Երեւանում Մայդան գտնելու փորձ: «Այդ ամենը իրականության հետ ոչ մի ընդհանուր բան չունի: Այնտեղ հավաքվել են մեր քաղաքացիները, գների բարձրացումը բոլորին է հուզում: Այդ պատճառով էլ մեր նախագահը հրամայել է աուդիտ անցկացնել, որը կտեւի 6 ամիս: Շարժումը ոչ մի քաղաքական կուսակցություն չի ղեկավարում: Սա մարդկանց պայքար է, ովքեր անհանգստանում են իրենց իրավունքների համար: Մենք այս մասին հայտնել ենք բելառուսական բոլոր այն լրատվամիջոցներին, որոնց հետ շփվել ենք»,- հայտարարեց փոխխոսնակը:
