Ադրբեջանի քաղաքացի Դիլհամ Ասքերովը, որը ԼՂՀ դատարանի կողմից դատապարտվել է ցմահ ազատազրկման, դեռեւս ներման խնդրով չի դիմել ԼՂՀ նախագահին: Այս մասին NEWS.am-ի թղթակցին հայտնել է նրա փաստաբան Էրիկ Բեգլարյանը:
«Ներման միջնորդություն դեռ չի ներկայացվել, քանի որ Ասքերովը նման ցանկություն չի հայտնել»,-նշել է փաստաբանը՝ ընդգծելով, որ ներման խնդրանքով ԼՂՀ նախագահին դիմելը երկրի սահմանադրությունում ամրագրված իրավունք է:
Էրիկ Բեգլարյանը նշել է, որ նման դիմում ներկայացնելու համար ժամանակային սահմանափակումներ չկան:
Հիշեցնենք, որ ավելի վաղ ԼՂՀ ոստիկանությունը տարածել էր, որ Ադրբեջանի քաղաքացիներ Շահբազ Գուլիեւը (1968թ. ծնված), Դիլհամ Ասկերովը (1960թ. ծնված), ինչպես նաեւ սպանված երրորդ մասնակից Հասան Հասանովը, ունենալով զենք եւ զինամթերք, 2014թ. հունիսի 29-ին ապօրինաբար հատել էին ԼՂՀ պետական սահմանը եւ ներխուժել Հանրապետության Շահումյանի շրջանի տարածք՝ հետախուզական գործողությունների նպատակով:
Տվյալ անձինք հատուկ առաջադրանքով տեղեկություններ էին հավաքել եւ լրտեսական գործունեություն իրականացրել: Ավելին, նրանք զենքի գործադրմամբ հուլիսի 4-ին առեւանգել էին ԼՂՀ անչափահաս քաղաքացի Սմբատ Ցականյանին, որի մարմինը հրազենային վնասվածքներով հայտնաբերվել էր հուլիսի 15-ին Քարվաճառ եւ Մանաշիդ համայնքների միջեւ ընկած անտառային զանգվածում: Բացի այդ, Հասանովը հուլիսի 11-ի երեկոյան Վարդենիս-Քարվաճառ ճանապարհի 32-րդ կմ-ին ազգային ատելության հողի վրա հրազենով սպանել էր Երեւանի բնակիչ Սարգիս Աբրահամյանին (1971թ. ծնված), իսկ Կոտայքի մարզի Ձորաղբյուր գյուղի բնակիչ Կարինե Դավթյանին հրազենային վնասվածքներ էր հասցրել: Նա զինված դիմադրություն էր ցույց տվել ձերբակալման ժամանակ եւ վնասազերծվել:
Նշենք, որ ԼՂՀ ընդհանուր իրավասության առաջին ատյանի դատարանի վճռով Դիլհամ Ասկերովը դատապարտվել է ցմահ, իսկ Գուլիեւը՝ 22 տարվա ազատազրկման:
Վերաքննիչ եւ գերագույն դատարանները ուժի մեջ են թողել դատավճիռը: