Transparency International իրավապաշտպան կազմակերպությունը իր նոր զեկույցում նախազգուշացրել է Արեւելյան Եվրոպայի երկրներում կառուպցիայի դեմ պայքարում առաջընթացի բացակայության եւ ժողովրդավարական գործընթացներին սպառնացող վտանգի մասին: Զեկույցում վերլուծել են Հայաստանի, Ադրբեջանի, Վրաստանի, Մոլդովայի եւ Ուկրաինայի՝ կաշառակերության դեմ պայքարի համար պատասխանատու տասնյակ գերատեսչությունների աշխատանքը:
Առաջիկա 5 տարվա ընթացքում ԵՄ-ն մտադիր է այդ երկրներին առնվազն 16.6 մլրդ դոլար ֆինանսական օգնություն տրամադրել: Transparency International –ը հայտարարում է, որ շատ մեծ է ռիսկը, որ այդ գումարը կմնա կաշառակերների գրպանում: Զեկույցում նշվում է, որ չնայած ընդունած օրենքներին՝ քաղաքական եւ բիզնես վերնախավերը այդ երկրներում մեծ ազդեցություն ունեն դատական եւ օրենսդրական ոլորտների վրա, ինչը նպաստում է կոռուպցիային:
Փորձագետների տվյալներով՝ քաղաքական դրդապատճառներով իրականացվող հալածանքները եւ կառավարության միջամտությունը հատկապես սուր է Մոլդովայում եւ Ուկրաինայում: Զեկույցը նշում է, որ մամուլի եւ ՀԿ-ների վրա վախեցնելու, հալածելու եւ ակտիվիստներին ու լրագրողներին ձերբակալելու միջոցով իրականացվող ճնշումն ուժեղանում է Հայաստանում եւ Ադրբեջանում:
Հայաստանին ուղղված խորհուրդներում նշվում է, որ կառավարությունը եւ խորհրդարանը պետք է արգելեն խորհրդարանի անդամներին եւ պաշտոնատար անձանց զբաղվել ձեռնարկատիրական գործունեությամբ:
Նման գործողությունների համար պատժամիջոցները պետք է ներդրվեն նաեւ նրանց համար, որոնք գիտեն նման պրակտիկայի մասին, բայց չի հայտնում:
Բացի այդ, դատական համակարգը պետք է զգալիորեն արագացնի կոռուպցիոն իրավախախտումների հետապնդման արագությունը՝ մեծ առաջնահերթություն տալով բարձրաստիճան պաշտոնյաների հետապնդումներին՝ քաղաքացիների շրջանում վստահության ամրապնդման նպատակով:
