Ռուսական լրատվամիջոցները տարակուսած էին և չգիտեին, թե ինչպես լուսաբանել հայաստանյան իրադարձությունները։ Այս մասին «Ամերիկայի ձայնին» տված հարցազրույցում նշել է Էխո Մոսկվի» ռադիոկայանի գլխավոր խմբագիր Ալեքսեյ Վենեդիկտովը:
«Մի կողմից կա գիտակցություն, որ Հայաստանը հետխորհրդային երկրների շրջանում Ռուսաստանի ամենամոտ դաշնակիցն է, մյուս կողմից՝ ռուսական լրատվամիջոցները պատրաստ չէին դեպքերի նման զարգացմանը, իսկ Կրեմլը ոչինչ չէր ազդարարում։ Այդ իսկ պատճառով լուսաբանումը իմ դիտարկմամբ հասցված էր նվազագույնի»,-ասել է նա:
Վենեդիկտովի խոսքով՝ նման իրավիճակում հայաստանյան ցույցերը կարելի էր պիտակավորել որպես «Հայկական Մայդան», կամ ԱՄՆ-ի հատուկ ծառայությունների կազմակերպած նախագիծ: «Սակայն իմ տպավորությունն այն էր, որ այս թեզը հեռու չգնաց, քանզի Կրեմլից եկավ՝ իրավիճակը հարթելու և աղմուկ չբարձրացնելու որոշում։ Սա եւս մեկ անգամ փաստում է Ռուսաստանի պետական լրատվամիջոցների կախյալ լինելու մասին»,- ընդգծել է նա:
Հիշեցնենք, որ հոսանքի թանկացման դեմ բողոքի ցույցերի լուսաբանումը ռուսական մամուլում բուռն հակազդեցություն էր առաջացրել Հայաստանում: Բանը հասել էր նրան, որ ռուսաստանյան հեռուստաընկերությունների լրագրողները դժվարությունների էին հանդիպում այդ իրադարձությունները լուսաբանելիս, քանի որ ուղիղ եթերի ժամանակ ցուցարարները այդ լրատվամիջոցներին ծախվածության մեջ մեղադրող պաստառներ էին պարզում:
