Մոսկվան այս ցույցերից իրոք շատ էր վախեցել եւ կարծում էր, թե Հայաստանը մոտ է իշխանությունը բռնի ուժով տապալելուն: Նման կարծիք է հայտնել Huffingtonpost Deutschland-ի հոդվածագիր Գունդա Վինդմյուլերը՝ իր հոդվածում անդրադառնալով Երեւանում էլեկտրաէներգիայի սակագնի բարձրացման դեմ բողոքի ցույցերին: Ռուսական կառավարական շրջանակները լուրջ տագնապներ ունեն Հայաստանում կատարվող իրադարձությունների կապակցությամբ: Նրանք կարծում են, որ կատարվածի հետեւում կանգնած է ԱՄՆ-ը՝ իր դավադիր պլաններով: Մինչդեռ ցույցերում բարձր հնչում են ՀԷՑ-ին եւ երկրի ղեկավարությանը կաշառակերության մեջ մեղադրող վանկարկումներ, գրում է հեղինակը՝ նշելով, որ մի երկրում, որտեղ բնակչության 30 տոկոսն աղքատության եզրին է գտնվում, այդ 7 դրամը հսկայական թիվ է: Եվ այդ բողոքի հիմքում ընկած է նաեւ այն հանգամանքը, որ Ռուսաստանից մեծ կախվածության մեջ գտնվող Հայաստանի տնտեսական վիճակը վերջին շրջանում ավելի է վատթարացել:
Ճգնաժամ ապրող ռուբլին հարվածեց Հայաստանի առանց այդ էլ թույլ դիրքերին, գրում է հեղինակը եւ կանխատեսելով ցույցերի հետագա բնույթը՝ նշում, որ հնարավոր է, իհարկե, այդ ցույցերը հետագայում ավելի ընդլայնվեն, սակայն ռուսների այն վախը, թե դա Ուկրաինայի նման կհանգեցնի իշխանափոխության, անհիմն է:
Վերլուծաբանները շատ ցածր են գնահատում նման զարգացման հնարավորությունը: Ռուսաստանը պատրաստ չէ կորցնել հետխորհրդային եւս մեկ երկիր, եւ Պուտինը դեռեւս չի ուզում ի դեմս Երեւանի ձեռք բերել եւս մեկ թշնամու, եզրափակում է հեղինակը:
