Երեւանի քաղաքապետարանի ենթակայության գրադարաններում տասնամյակների դադարից հետո իրականացվող նորոգման եւ հիմնանորոգման ծրագրի շրջանակում ընթերցասեր հասարակության համար ապահովվում են նոր ու հարմարավետ պայմաններ: Այս աշխատանքներն ամբողջողությամբ կավարտվեն ընթացիկ տարում, ու գրադարանները լիովին կծառայեն իրենց նպատակին: Ծրագրի շրջանակում շուրջ 2500 ընթերցողների առջեւ հարմարավետ պայմաններով իր դռները կբացի նաեւ Շենգավիթի թիվ 32 գրադարանը: Վարչական շրջան կատարած շրջայցի ընթացում քաղաքապետին ներկայացնելով աշխատանքների մանրամասները` պատասխանատուները զեկուցել են, որ գրադարանի 4-րդ կարգի վթարայնության շենքն ամբողջությամբ քանդվել է եւ տեղում կառուցվում է նորը:
«Վերջին տարիներին Երեւանի զարգացման ծրագրերում մենք առանձնակի կարեւորում ենք քաղաքապետարանի ենթակայության կրթական եւ մշակութային հաստատությունների հիմնախնդիրն ու, ըստ այդմ, նպատակային քայլեր ենք ձեռնարկում դրանք հետզհետե կարգավորելու ուղղությամբ: Այդ համատեքստում է նաեւ Երեւանի քաղաքապետարանի ենթակայության գրադարանների նորոգման եւ հիմնանորոգման խնդիրը, որի կարգավորման ուղղությամբ, 2012 թվականից սկսած, լայնածավալ աշխատանքներ ենք իրականացնում: Եվ անցած 3 տարիների ընթացքում նորոգվել եւ հիմնանորոգվել է 36 գրադարան: Նշեմ, որ քաղաքապետարանի ենթակայության տակ ունենք 19 գրադարան՝ իրենց 18 մասնաճյուղերով, նաեւ 3 պահոց, ու այս տարի մենք ամբողջությամբ ավարտում ենք գրադարանների նորոգման աշխատանքները: Ի դեպ, նաեւ նշեմ, որ այս ծրագիրը բավականին սպասված էր, քանի որ մի քանի տասնամյակ շարունակ գրադարանների նորոգման աշխատանքներ ընդհանրապես չէին իրականացվել»,- ընդգծել է քաղաքապետը` հավելելով, որ վերջին 2-3 տարիների ընթացքում լուրջ աշխատանքներ են իրականացվում նաեւ գրքային ֆոնդի համալրման ուղղությամբ: Ըստ այդմ, նշված ժամանակահատվածում շուրջ 30.000 կտոր նոր գրքեր են տրամադրվել մայրաքաղաքի գրադարաններին, ինչը եւս աննախադեպ է, քանզի ավելի քան 20 տարի համալրումներ չէր եղել:
«Մենք նաեւ քայլեր ենք ձեռնարկում նորոգված գրադարանները ոչ միայն գրքային ֆոնդով, այլեւ համակարգիչներով, ժամանակակից այլ սարքավորումներով եւ տեխնիկական միջոցներով համալրելու ուղղությամբ: Արդեն կոնկրետ քայլեր են ձեռնարկվում էլեկտրոնային գրական ֆոնդեր ունենալու ուղղությամբ: Ու ես վստահ եմ, որ այս բոլոր աշխատանքների ավարտից հետո, շատ կարճ ժամանակ անց մեր համաքաղաքացիները, ինչպես հին ու բարի ժամանակներում, դարձյալ մեծ հաճույքով ու հաճախ կօգտվեն գրադարաններից»,- նշել է քաղաքապետը:
Ծանոթանալով գործընթացին` քաղաքապետ Տարոն Մարգարյանը պատասխանատուներին մեկ անգամ եւս հանձնարարել է ամենօրյա անմիջական հսկողության տակ պահել կատարվող աշխատանքների ընթացքը, վերահսկել դրանց որակյալ կատարման ապահովումն ու լինել հետեւողական` սահմանված ժամկետում աշխատանքն ավարտելու համար:
Վարչական շրջանի ղեկավարի ուղեկցությամբ քաղաքապետ Տարոն Մարգարյանը ծանոթացել է նաեւ ազատամարտիկ Արթուր Կարապետյանի անվան այգու բարեկարգման աշխատանքների ընթացքին: Զեկուցվել է, որ ծրագրի շրջանակում հանգստի գոտին կկահավորվի նստարաններով, զրուցարաններով, աղբամաններով ու մանուկների համար խաղահրապարակներով: Այգին ամբողջությամբ կապահովվի նաեւ արտաքին լուսավորության նոր համակարգով ու ոռոգման ցանցով: Շնորհակալություն հայտնելով ծրագրի կյանքի կոչման համար` ազատամարտիկի հայրը նկատել է, որ հանգստի գոտու բարեկարգումը ինչպես հարգանքի յուրօրինակ տուրք է, այնպես էլ տարածքի բնակիչների լիարժեք հանգստի կազմակերպման լավագույն տարբերակ: Քաղաքապետ Տարոն Մարգարյանը պատասխանատուներին մեկ անգամ եւս հանձնարարել է բարեկարգման աշխատանքների ընթացքում ականջալուր լինել բնակիչների առաջարկներին եւ կարծիքներին, նաեւ հաշվի առնել նրանց կողմից առաջադրվող մոտեցումները:
