Երեւանի Ազատության հրապարակից մեկնարկեց Բաղրամյան պողոտայի նստացույցը համակարգող անդամների կազմակերպած իրազեկման երթը, որի նպատակն է՝ քաղաքացիներին տեղեկացնել Բաղրամյան պողոտայում արդեն 12-րդ օրը շարունակվող նստացույցի մասին:
Իրազեկման երթի մասնակիցներն Ազատության հրապարակից երթով շարժվում են դեպի Հյուսիսային պողոտա, այնուհետեւ Հանրապետության հրապարակ, որից հետո Ամիրյան փողոցով, Մաշտոցի պողոտայով հասնելու են Բաղրամյան պողոտա:
Երթի մասնակիցները վանկարկում են «Միացի՛ր», «Չեղարկո՛ւմ», «Ո՛չ լույսի թանկացմանը» եւ բարձրախոսով քաղաքացիներին հորդորում են միանալ Բաղրամյան պողոտայի նստացույցին:
NEWS.am-ի թղթակցի փոխանցմամբ, երթի մասնակիցները մի պահ կանգ են առել ՀՀ Էներգետիկայի եւ բնական պաշարների նախարարության առջեւ: Նրանք դժգոհում են, որ ոստիկանները երթի վերջում պատ են կազմել եւ քաղաքացիները չեն կարողանում միանալ իրենց:
Բաղրամյանի նստացույցի համակարգող Դավիթ Սանասարյանը լրագրողների հետ զրույցում դժգոհություն հայտնեց այդ առիթով՝ նշելով, որ ոստիկանների թիվը բավական շատ է:
«Մենք ավելի քիչ ենք, քան ոստիկանները, նրանց կարիքն ընդհանրապես չկա, բայց քանի որ հսկում են, թող գոնե երթի կողքով քայլեն, ոչ թե խոչընդոտեն երթը»,- ասաց նա:
Նշենք, որ այս դժգոհություններից հետո ոստիկանները սկսեցին քայլել երթի մասնակիցների կողքով:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ-ի նիստում հաստատվել է էլեկտրաէներգիայի նոր սակագինը։ Էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունն առաջարկել էր 1 կիլովատտ/ժամը թանկացնել 17 դրամով: