Երեւանի Ազատության հրապարակից մեկնարկած իրազեկման երթն ավարտվեց Բաղրամյան պողոտայում: Երթի մասնակիցները քիչ առաջ միացան Բաղրամյան պողոտայի նստացույցի մասնակիցներին:
Բաղրամյան պողոտայում նստացույցի համակարգող Դավիթ Սանասարյանը NEWS.am-ի հետ զրույցում կարեւորեց քաղաքացիների մասնակցությունը էլեկտրաէներգիայի սակագնի բարձրացման որոշման չեղարկում պահանջող նստացույցին:
«Իրազեկման երթով քաղաքացիներին տեղեկացրինք եւ հորդորեցինք մասնակցել Բաղրամյանում շարունակվող նստացույցին, քանի որ կարեւոր է, որ քաղաքացիները գան, մասնակցեն պայքարին»,- ասաց նա:
«Ո՛չ թալանին» նախաձեռնության անդամ Մաքսիմ Սարգսյանն էլ լրագրողների հետ զրույցում նշեց, որ էլեկտրաէներգիայի սակագնի բարձրացման դեմ պայքարն աննախադեպ էր:
«Այս պայքարն աննախադեպ էր, քանի որ հանրապետության շուրջ 16 քաղաքների բնակիչներ նույնպես միացել են մեզ եւ պայքարում են, մեզ են միացել նաեւ ամբողջ աշխարհի հայերը, որոնք տարբեր միջոցներով փորձում են աջակցել մեզ: Պայքարը շարունակություն կունենա՝ մինչեւ մեր պահանջի կատարումը»,- ասաց նա:
Նշենք, որ այս պահին Բաղրամյան պողոտայում տեղի է ունենում «Զոմբի» ռոք խմբի համերգը: Պողոտան այսօր մարդաշատ չէ:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։