«Չորրորդ իշխանություն» թերթը գրում է. «ՉԻ» տեղեկություններով նոր կոնֆլիկտ է հասունանում քրեական աշխարհում, եւ ինչպես մնացած բոլոր դեպքերում, այս անգամ եւս պատմության մեջ շոշափվում են բարձրաստիճան պաշտոնյաների զավակների ու ազգականների անունները: Այս անգամ իրադարձությունները պտտվում են Սերժ Սարգսյանի թիկնազորի պետ Վաչիկ Ղազարյանի որդու՝ Մհերի եւ ԱԺ պատգամավոր Սամվել Ալեքսանյանի զարմիկի՝ Գեւորի անունները: Մի կողմում Մհերն ու Գեւորն են, մյուս կողմում՝ թաղային հեղինակության համարում ունեցող Քանաքեռցի Տույը:

Մեր տեղեկություններով՝ Վաչե Ղազարյանի որդին՝ Մհերը եւ Սամվել Ալեքսանյանի զարմիկը՝ Գեւորը, խնդիր են ունենում քաղաքացիներից մեկի հետ: Նա պաշտպանության նպատակով դիմում է թաղային հեղինակությանը՝ Տույին: Վերջինս քաղաքացու շահերի պաշտպանության շրջանակներում հեռախոսազրույց է ունենում Մհերի եւ Գեւորի հետ, որոնք հայտարարում են, որ իրեն դիմած անձնավորությունը սխալ է պահել իրեն, ուստի պետք է պատժվի: Տույն էլ փորձում է խնդիրը լուծել՝ վկայակոչելով իր անձն ու հեղինակությունը: Սա զայրացնում է երիտասարդներին, որոնք կոպիտ ու վիրավորական բառերով հեռուն են ուղարկում Տույին: Վերջինս էլ դնում է լսափողը եւ այլեւս չի պատասխանում բարձրաստիճանների ազգականների հեռախոսազանգերին:

Հասկանալով, որ պատմությունը կարող է իր դեմ շրջվել՝ Քանաքեռցին այս անգամ արդեն իր պաշտպանության հարցերով դիմում է գեներալ Հայկազ Բաղմանյանին եւ ԴԱՀԿ պետ Միհրան Պողոսյանին՝ Քեթրինի Միհրանին: Թե ինչպես կամ ում օգտին կհանգուցալուծվի ստեղծված իրավիճակը՝ պարզ կդառնա առաջիկա զարգացումներից»:

Առավել մանրամասն՝ թերթի այսօրվա համարում