Բոլորդ գիտակից մարդիկ եք, ձեր ձեռքով ինքնուրույն ապամոնտաժեք աղբամանները եւ գնացեք: Այսօ մասին այսօր՝ հուլիսի 4-ի առավոտյան, Բաղրամյան պողոտայում արդեն 13 օր շարունակվող նստացույցի մասնակիցներին է դիմել Երեւանի փոխոստիկանապետ Վալերի Օսիպյանը:
«Եկել եք 100 հոգով փակել եք Երեւանի կենտրոնական փողոցներից մեկը: Դա ճիշտ չէ, դուք ինքներդ հեռացրեք աղբամանները եւ բացեք պողոտան»,-նշել է Օսիպյանը:
Նա նաեւ խորհուրդ տվեց երիտասարդներին մասնագիտական խումբ ձեւավորել տնտեսագետներից, իրավաբաններից եւ մասնակցել ՀԷՑ-ի աուդիտի ընթացքին, հավելելով, որ Բաղրամյան պողոտայում մնալով ցուցարարներն իզուր ժամանակ են կորցնում:
«Դուք արդեն որոշակի հաղթանակ գրանցել եք, հիմա ժամանակն է, որ գնաք ու աուդիտի մասնակցեք: Բոլոր գիտակից մարդիկ այլեւս չեն գալիս, մնացել եք 100 հոգով»,-ընդգծել է Երեւանի փոխոստիկանապետը:
Ի պատասխան ցուցարարները նշեցին, որ Բաղրամյան պողոտան կլքեն այն ժամանակ, երբ իրենց երեք պահանջները կատարվեն: «Մեր 100 հոգին կարող է 10 հազար դառնալ»,-ասել են նրանք:
Հարակից շենքերի բնակիչներից մեկն էլ գանգատվեց Օսիպյանին, որ նստացույցի պատճառով իրենց ամբողջ շենքի մեքենաները կագնեցնում են հարակից փողոցներում:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: